Tabangi mi ninyo

Kaniadtong Huwebes, gi-clamped sa mga traffic enforcers ang sakyanan sa Cebu City Hall kay nasakpang gi-park sa No Parking Anytime nga bahin sa karsada ug nakapahasol sa mangagi nga sakyanan.

Ang uban nagduda nga drama ra kuno ang gihimos a mga traffic enforcer. Isip sakop sa Cebu City Traffic Management Board, tug-anan ko kamo nga adunay kamandoan nga estriktohon gyud ug way pilion sa kampanya.

Gani, gi-discuss namo nga ang kilid nga bahin sa City Hall nga kabahin sa M.C. Briones Street, kon dili gyud malikayan nga adunay mo-park, itugot na lang ang pagparking. Sa ato pa, kadtong mga ibilin nga No Parking area, estriktohon gyud pagpatuman. Sa meeting namo sa Traffic Board karong Miyerkules, usa sa among hisgotan ang pamaagi, nga kon kinsa ang driver sa government vehicle nga ma-clamped, maoy pabayron sa multa aron way moabuso abi kay sakyanan sa gobiyerno.

Gusto sa bag-ong mga sakop sa Cebu City Traffic Management Board nga dunay kausaban. Mao man gani nga may mga amigo namo nga nagpasidaan nga pasayloon sila kon masakpang makahimo og salaod, apan among gibalibaran.

Nasayop kami nga daghan ang mangasuko, apan kon ipatuman gyud ang tukma nga gilatid sa balaod, mas daghan ang mangalipay kay sa mga tawo nga mangasuko. Mao nga palihug, suportahi mi ninyo nga mopatuman og kausaban.

Katulo pa kami nag-meeting ang mga sakop sa bag-ong Traffic Management Board ug daghan pa kaayong problema nga angay namong tagdon.

Angkonon nako nga tingali, duna gyuy pipila ka badlongong traffic enforcers, mao nga tabangi mi ninyo sa pag-ila sa uban kon kinsa sila.

May pipila na kami ka ngalan sa mga traffic enforcers nga mangilkil sa mga tag-iya og trucking services, galing lang kay ang mga hingtungdan dili mokooperar, mao nga mangita ra mi og laing paagi nga masakpan sila.

Kamong mga traffic enforcers nga magsakay pa og patrol car sa pagsulod sa mga container yard ug opisina sa mga trucking services, palihug, hunonga na ninyo kay makauuwaw kaayo ang inyong gihimo.

Likayi sab ninyo nga magpundok ang tulo, o upat ka enforcers ilawom sa landong, ug magsige’g tabi, nga gibiyaan ang ilang mga pwesto sa pagdumala sa trapiko.

Daghang mga mata nga nagpaniid lang kaninyo, ug aron magpadayon nga magtrabaho mo sa siyudad, palihug magbag-o na ta sa atong kinaiya.

Gipaagi nako sa lindog ang awhag aron makabasa ang mga hingtungdan, ilabi na ang publiko ug motabang sila kanamo sa pagtul-id sa mga dili maayong binuhatan sa ubang enforcer. Unya, kamo sab nga mga motorista, palihug, siguroa nga kompleto sab ang inyong mga sakyanan ug pagtarong sa pagmaneho aron dili mo madakpan.