EDITORYAL - Pugsanay na diay?
Duna karoy balaudnon nga giduso sa usa ka kongresista sa Negros nga gihimong sumsoman karon sa mga tawo ilabi na sa social media.
Kini ang balaudnon ni Negros Oriental Kong. Arnie Teves Jr. nga anti-ghosting law nga magdeklarar niini nga usa ka emotional offense.
Ang ghosting sumala pa sa iyang kahulogan sa maong balaudnon mao kadtong kalit nga wala pagpakita sa karelasyon.
Kinahanglan nga sila dugay nang may relasyon o dugay nang nag ipon mga walay kasal unya kalit nga wala ma pakita nga way pananghid.
Matud pa niya ang maong buhat makamugna og emotional distress o tumang kagul-anan sa gibiyaan.
Kung buot isipon, personal kaayo kini ug kaduhaduhaan kun duna bay modangop aning balaura.
Una sa tanan, dunay kinaiya sa mga Pilipino nga luomon ang problema ilabina kun kini personal kaayo unya moresulta sa kauwawan.
Kaning mga ingon ani ka personal nga problema maresolba ra man sa mga tawong nalambigit nga sila sila ra pinaagi sa pagpinasayloay.
Sa pagsulod og relasyon, ilabi na kun seryuso kabalo naman tingali ang tanan sa risgo.
Mahulog nga usa kini ka panimawos sa gibiyaan.Makatarunganon pa ba ni para sa mibiya kun dili na gyud siya gusto?
Wala ba tan-awa ang katungod sa namiya, unya pugson siyang makigbalik niadtong tawong di na niya gusto?
Duna namay mas bug-at nga mga balaod nga nagprotihir sa mga tawo gikan sa mga domestic violence.
Unsa may legal nga basihan sa moreklamo aron ipiton ang kabubut-om sa iyang gireklamong uyab nga di man sila kasado?
- Latest