Leksyon

Bisan og dili mi kaila, nasubo ko sa nahitabo ni Nikka Marie Ledesma dela Cruz, nga sakop sa media dinhi sa Cebu sulod sa hamubo nga higayon apan nahimong aktibista ug apil sa napatay sa mga tropa sa kagamhanan didto sa Negros Occidental.

Nahimong deskman, kon tighimo og balita sa newsroom sa DYSS Super Radyo si Nikka, ug gani may profile picture siya sa social media nga diha siya naglingkod sa announcer’s booth. Gwapa si Nikka ug gani nahimo pa kuno nga Miss KBP.

Wa sila magkalisud-lisud kay doktora ang iyang ginikanan ug gradwado si Nikka sa kurso nga Journalism sa University of San Jose Recoletos. Wa na kuno mo-renew si Nikka sa iyang kontrata pagtrabaho sa DYSS.

Nahibaw-an na lang nga mag-apilan na si Nikka sa mga rally Anak Bayan ug sa Gabriela, usa ka pundok sa kababayen-an nga gihulagway sa militar nga “legal front” sa mga rebelde.

Kaniadtong Hulyo 6, girespondehan sa kapolisan ug militar ang report nga may mga armadong tawo nga nasigpatan didto sa Barangay Santol, lungsod sa Binalbagan, Negros Occidental, ug tuod gikasangka nila ang mga rebelde.

Upat ka gidudahang mga rebelde ang napatay, tulo ka lalaki ug ingon man si Nikka, nga nagpaila didto sa ngalan nga Chai.

* * *

Sa laktod, anugon kaayo si Nikka nga nakahuman na unta sa iyang kurso apan giusikan ra niya kay nadani siya sa mga rebelde. Gisuwat ko kini aron nga makuhaan unta og leksyon sa ubang mga batan-on ang nahitabo kang Nikka.

Ayaw gyud kamo pagpadani sa mga rebelde, pinaagi sa ilang mga kaalyado, nga ang uban nakasulod pa gani diha sa mga iladong unibersidad kay sila igo ra mogun-ob sa inyong maayong kaugmaon.

Maoy kuhai ninyo og ehemplo ang ubang sakop sa media nga nagtinarong, nagpadayon pagtungha ug karon nahimo na nga mga abogado.

* * *

Nag-convene na ang mga sakop sa Cebu City Traffic Management Board ug daghan mi’g mga plano aron pagpahapsay sa dagan sa trapiko dinhi sa Cebu City.

Among nahukman nga paspasan ang paghimo og kampanya batok sa mga drayber nga magpadagan sa ilang sakyanan panahon sa gabii ug dili mopasiga sa ilang suga.

Apil nga sakop sa Traffic Management Board ang LTO, Traffic Group, LTFRB, mao nga sa hiniusang operation unya, daghan gyud ang madakpan.

Busa, hangyo nako sa mga drayber, ilabi na sa mga PUJ’s nga maoy sagad abusado kaayong mopadagan sa ilang sakyanan, nga magbag-o na.

Kon kaniadto pasagdan ra ninyo nga dili bayran ang inyong multahanan, karon susihon na kini namo kanunay ug kadtong dili mobayad human sila madakpi, amo gyud nga pasakaan og kaso.