Baha

Human sa grabing baha sa miaging semana, gipasalig ni Mayor Michael Rama nga himoong prioridad sa iyang administrasyon ang pagsulbad niini.

Wa siyay detalyeng gihatag unsaon ni pagkab-ot apan iyang damgo nga mahimong sama sa Singapore ang dakbayan sa Sugbo ubos sa iyang liderato.

Ambisyoso ang plano ni Rama apan di ni imposible. Lig-on nga liderato, husto ug klarong mga plano uban sa hinugtanay nga implementasyon niini ingon man usab ang seryosong pagpatuman sa mga lagda aron pagtudlo og disiplina sa matag-usa ang gikinahanglan.

Sa laktud, political will maoy unang gikinahanglan aron masulbad ang problema.

Ang pangutana duna bay political will si Rama paghimong realidad sa iyang damgo alang sa syudad?

Kun wala ko masayop, dili ni unang higayon nga gipasalig ni Rama nga himoong prioridad ang problema sa pagbaha.

Niadtong unang higayon nga nahimo siyang mayor mao sab ni iyang pasalig apan way nahitabo.

Bisan ang pagsugod sa unang ang-ang sa kasulbaran sa problema—ang paglimpiyo sa mga sapa gikan sa mga informal settlers nga dako og natampo pagkipot sa mga agianan sa tubig— wala niya mahimo.

Ang hinungdan politika. Hinuon dili lang si Rama ang wala makahimo niini kun dili lakip ang ubang mga nahimong mayor sa dakbayan.

Mahadlok ang mga politiko nga mangusog pagpabalhin sa mga nanimuyo daplin sa kasapaan tungod kay igo-igo sab gyud ang gidaghanon nila nga mahimong makaapekto sa resulta sa eleksiyon.

Kun buot gyud si Rama nga masulbad ang problema sa baha ang una niyang angayang buhaton mao ang paghawan sa mga agianan sa tubig. Ikaduha, padak-an ang mga drainage; ikatulo, hingpit nga i dili ang paggamit og plastic; ika-upat, hugot nga pagpatuman sa ordinansa batok sa pagpataka og labay sa basura; ug ika-lima, pugson ang tanang panimay ug tag-iya og edipisyo nga isawod ang tubig sa uwan pinaagi pagbutang og rainwater catchment aron maminusan ang gidaghanon sa tubig nga modagayday paingon sa drainage.

Hangtud nga dili ni mahimo, magpabilin nga damgo ug way katumanan ang pangandoy ni Rama nga mahisama sa Singapore ang dakbayan sa Sugbo.

* * *

Biyernes sa kadlawon dihang gipukaw ko sa di maayong kasayuran—mitaliwan na ang usa sa suod nakong higala sa industriya, ang kanhi Editor-in- Chief sa Sunstar Superbalita ug maglilindog nga si Anol Mongaya.

Mahigalaon si Sir Anol hinungdan nga bisan layo ang gintang sa among pangidaron ug bisan sa iyang kailado na sa industriya sa media dali ra mi nga nagkasuod.

Buotan ug wa gyuy libog nga klase sa tawo. Dili burokinto apan hait ug dunay prinsipyo ug baruganan.

Alang sa iyang mga amigo, dili lang siya higala kun dili maisip sab siya nga daw sama sa igsuon nga mahimo nimong kadangpan sa higayon nga ikaw nagkinahanglan.

Adios, Sir Anol!