Harang lalawigan

Ambot unsay matang sa hangin ang misagpa ni Lapu-Lapu City Mayor Junard Chan nga misantop sa iyang huna-huna ang pagtukod og laing probinsiya.

Bisan misuway siya'g tago ni anhing secretary Adelino Sitoy nga mao kunoy nagdamgo sa katukuran sa Mactan Province apan misiwil gyud ang iyang naghingapin nga ambisyon nga mahimong gobernador.

Ang resulta sa miaging eleksiyon tingali nakapahubog ni Chan sa iyang gahom. Tungod sa suporta sa mga Oponganon aron siya masublian pagkamayor ug modaog ang iyang asawa isip kongresista, nagtuo siyang di mapugngan ug wa nay makabadlong sa iyang ambisyon.

Gamay ra ang probinsiya sa Sugbo aron buk-on sa mga ambisyosong politiko nga way laing gihuna-huna gawas sa personal nilang interest.

Tataw nga dili interest sa mga Oponganon ang gilantaw ni Chan sa iyang tinguha kun dili iya ug sa iyang pamilya.

Kun interesado si Chan nga mahimong gobernador nganong di siya makigsakbang ni Gobernador Gwen Garcia sa sunod election?

Inay maghunahuna sa iyang ugma sa politika, dili kaha mas maayong unahon ni Chan pag-atiman ang daghang problema sa iyang dakbayan?

Natubag na ba niya ang tanang panginahanglan sa Lapu-Lapu sama sa pagsulbad sa baha, traffic, basura, tambal sa mga kabus ug uban pa nga batakang serbisyo?

Hinaot makakat-on si Chan og leksiyon sa kasaysayan sa dili pa awahi ang tanan.

Basin matakli ang suporta sa mga Oponganon ngadto sa lain ug mapornada ang ikatulong termino alang niya kun siya magpasubli?

Kun nakalimot na si Chan, ang unang tulo ka mga kongresista nga nagtinguha pagbuak sa probinsiya kay di gyud makadaog og eleksiyon pagkagobernador mao silang Simeon Kintanar, Antonio Yapha ug Clavel Martinez.

Sa wala pa motapos ang ilang mga termino niadtong 2005 ilang gisuwayan og himo ang ilang mga distrito nga buwag nga probinsiya.

Nasuko ang mga Sugboanon sa ilang gihimo ug silang tanan napapas sa mapa sa politika sa ilang mga distrito.

Si anhing senador Sonny Osmeña misuway pagbanhaw sa lakang niadtong 2019 pinaagi sa pagsaad nga kun modaog siya pagkakongresista sa tirsiro distrito iya ni nga himoon nga buwag nga probinsiya.

Ang resulta, gilampurnas siya ni Kongresista Pablo John Garcia. Testamento ni nga ang mga Sugboanon di gusto nga mokunhod ang estado sa Sugbo isip harang probinsiya sa nasud tungod sa iyang kaadunahan dili lang sa bahandi kun dili sa tanang butang ug aspeto sa kinabuhi ug kasaysayan.