Suan migilaw ang hayag nga pamunoan

Nauso ang ‘utang kabubut-on’ nga kinaiya kasagaran sa atong mga politiko. Diin, kinsa gani kadtong mga higanteng dumadapig nila panahon sa pagpangampanya, makaangkon gyod og dakong luna sa ilang kasingkasing oras nga may ihangyo kini inig lingkod niining mga politikoha sa nadag-ang puwesto nga ilang gilansaran.

Subo paminawon, nga tungod sa utang kabubut-on nga mentalidad, diin gumikan niini, mao na hinuoy nahimong basehan sa pagdawat og empleyado, ang pagya nga: ‘It is not what you know but whom you know’, napakyas ang mayor diha sa iyang pagpili sa kinsay kinahaitan? Ug mao hinuoy gipasulod ang kinahabolan. Resulta?

May pipila ka guwatsinanggo, kinsa sa petsa 15 ug sa petsa 30 ra sa buwan motunga. Adlaw nga tingkuha sa ilang suweldo.

Maayo na lang nga base sa hataas nga kasinatian, dili na kini makalusot ubos sa pagpanimon ni Cebu City Mayor Michael ‘Mike’ Rama. Human kuykuya, estudyuhi ug timbangtimbanga ang performance record sa tanan niyang kawani, ang mga maayong mangangalagad iyang gipabilin, samtang ang mga tapolan, gihinginlan!  Nice move, mayor. Ayag pa more, aron ikasalindot ang nahabilin pang mga sagbot.

Daghang Sugboanon ang nakadayeg ning patas nga pamaagi ni Mayor Mike sa pagdawat-tener og mga empleyado. Pero mas daghan ang natandog sa diskarte ni Cordova Mayor Cesar ‘Didoy’ Suan, kinsa ning unang termino pa lang sa iyang pagka amahan sa lungsod, mipahibalo nga wala siyay taktakon nga department head, empleyado ug job orders.

Tanan, makapadayon sa pagserbisyo. Ubos sa usa ka kondisyon: Ang kaugalingon nilang agi, maoy basehan sa mayor paghukom kon angay ba silang i-renew, o buhian? Kaanindot nga direksiyon!

Wa gyuy bulok sa politka. Walay padrinong gipaboran. Walay kontra partidong giyatakan.  Ang panan-aw gipunting sa ginadamgong kahiusan nga puno sa gugma ug pagmahal sa iyang katawhan.

Sa kanhi pa niyang pagkakonsehal, namatud-an na nga si Mayor Suan usa ka buotan, kugihan ug para gyod sa kaayohan sa tanang Cordovanhon ang napondar nyang legasiya sulod ug gawas sa konseho. Samot na, nga siya na gayod karon ang mayor. Sama sa sayong kabuntagon, migilaw ang mga bulawanong bidlisiw sa pagpamunoan ni Mayor Suan.  Pagka suwerte sa taga Cordova.

Unta, dili moawop iyang kahayag!