Salamat PRRD mibuhagay

Sukad masukad, wala koy nasaksihang presidente sa Pilipinas nga bisag giunsag daot sa mga kaaway sa politika ang mga pamaagi sa pagpangalagad, miubos ang rating sa iyang pagdumala sa atong nasod. Si Presidente Rodrigo Roa Duterte (PRRD) ray nakahimo niini.

Tiaw bay, bisag matapos na iyang termino sa pagka pangulo, misaka gihapon iyahang trust rating ngadto sa 69% ug 75% sa approval rating. Kini base sa PUBLICUS Asia Incorporation’s PAHAYAG Second Quarter Survey (PQ2 2022). Layo ra kaayo ang mga nangaging presidente, kinsa nakakuha lag gikan sa 14% ngadto sa 27%.

Kon unsa ka dako ang gintang sa labaw ni PRRD ikompararar sa nakuha sa mga kanhing namunoan sa atong nasud, ingon niini ka dako ang mga legasiyang napondar nga ibilin niya sa tagsatagsa nato ka kasingkasing.

Hinungdan, nga ang mga lunod-patay’ng Diehard Duterte Supporters (DDS), milusad og programang SALAMAT PRRD thanksgiving concert didto sa Quirino Grandstand, Manila City sa miaging Hunyo 26 agig kinasingkasing pasalamat sa atong presidente.

War on drugs and corruption? Iya kining gitininuod. Ang nakaparat, kay kon may drug pusher o drug personality nga namatay sa engkuwentro sanglit misukol sa kapolisan, mao pay pakasad-on sa Commission on Human Rights (CHR) ang mga tinugyanan sa balaod. Kay kuno extra judicial killing ang ilang gihimo. Perog polis ang gipatay sa drug pusher? Baba sa CHR, tak-om! CHR ang babag sa maanindot nga tumong sa atong pangulo. Silay dugang hinungdan nganong dili mapukan sa hingpit ang illegal drugs syndicate sa Pilipinas.

Ang taas pirmeng resulta sa performance survey ni Duterte nga gihimo sa PUBLICUS Asia, momatuod nga kontento ug nakadayeg kaayo ang kinabag-an sa pagpamunoan niini.

Sa kaulohan, mibaha ang tarpaulins nga gipangbitay-plastar sa nagkalainlaing dapit, diin nahisulat: ‘SALAMAT PRRD’. Daw nanagdupang mga kamot, gustong mogakos-pasalamat ni Duterte.

Sa SALAMAT PRRD thanksgiving concert, mibaha ang nanambong. Daghang artista miduyog uban sa ilang giregalong awit alang ni Tatay Digong, kinsa mikanta sab sa iyang paboritong ‘Ikaw’. Ginaksanay. Hinilakay.  Maoy mihari sa maong mga yugto.

Unya, sa naghinapos nang programa, mipalanog si PRRD sa iyang pang-closing remarks nga speech: “Kaninyong tanan, daghan, daghan kaayong salamat!” Mubo ra tuod, pero may bug-at ug halawom nga kahulogan.