EDITORYAL – Bagong paglaum

Molingkod na karong udtong tutok ang bag-ong mga napiling opisyales sa gobiyerno gikan sa nasudnong kagamhanan hangtud sa lokal.

Ang bag-ong administrasyon pangulohan ni Presidente Ferdinand Marcos Jr. sa ehekutibo.

Samtang molingkod na sab ang mga bag-ong napili nga mga magbabalaod sa Kongreso ug mga lokal nga gobiyerno gikan sa gobernador hangtud sa mga konsehal sa kalungsoran ug siyudad.

Panghinaut ug pag-ampo sa tanan, nga unta tumanon sa mga bag-ong opisyales ang ilang mga gipangsaad atol sa kampanya.

Dili unta nila usikan ang panahon paggukod sa ilang mga higpit nga nakaatbang kung personal ra ang ilang tuyo.

Atimanon dayun ang mga batakamg serbisyo nga napasagdan o gikinahanglang palambuon.

Ang tanang opisyales nga molingkod pinaagi sa bag-ong mandato dili unta makalimot nga sila mangalagad sa katawhan ug dili maoy alagaran.

King gikinahanglang panangtangon ang mga kaniadto mga kawani nga nakapawalay ayo sa serbisyo publiko sa usa ka buhatan, buhata kini.

Kay sila ra man usab ang hinungdan nga mabulingan ang pangalan sa mga naglingkod nga mga lider.

Husto si Cebu City Mayor Michael Rama nga di na I renew ang mga kawani sa siyudad nga walay ayo sa trabaho.

Kay nag-usik lang niini sa kwartang pangsweldo ang siyudad.

Sa tanang mahibilin nga mga kawani , pagmatngon sa inyong trabaho, dili tanang tawong inyong makaatubang walay kabangkaagan ug kuyaw masumbong pa hinuon ko ug mao na sab unyay makulban og kaldero.

Sa mga naparot nga mga kandidato ug supporters sa mga pilderong kandidato, mas labing maayong suportahan ang mga bag-ong napiling mga lider.

Apan magbantay kanunay batok sa pagpanga-busar sa gahum bisan kinsa pa nila.