Kongreso sa pamilya

Ang 1987 nga Batakang Balaud sa Pilipinas nagdili sa dinastiya sa politika apan ang maong pagdili nanginahanglan pa kini og mopatuman nga balaud. Apan bisan sa mga balaudnon nga gipalabang aron ang pagdili sa dinastiya sa politika mapatuman wala gayud bisan usa niini ang nahimo nga balaud.

Tungod niini midagsa ang mga pamilya nga napili kay gipili sa katawhan sama pananglit sa Kongreso nga nahimo nang kongreso sa pamilya diin ang asawa ug bana, anak, igsoon, ig-agaw nanaghan na sa ika-19 nga Kongreso.

Nag-una nila mao ang inahan ug anak nga sila si Senador Cynthia Villar ug Mark Villar nga ang igsoon usab niini nga si Camille kongresista sa bugtong distrito sa Las Pinas. Gisundan sila sa magsoon nga sila si Senador Pia Cayetano ug Alan Peter Cayetano nga ang asawa nga kongresista napili nga Mayor sa Taguig City.

Nabalik usab sa Senado ang magsoon nga sila si Senador Jinggoy Estrada ug JV Ejercito. Ang maguwang ni Presidente Bongbong Marcos  Jr. nga si Senador Imee Marcos molingkod sa Senado samtang ang iyang pag-umangkon nga si Sandro nga anak sa Presidente molingkod isip kongresista sa Ilocos Norte. Ang bagong napili nga senador nga si Raffy Tulfo magkuyog og sa iyang asawa nga si Jocelyn sa Kongreso isip numero uno nga nominee sa ACT-CIS party-list ug napili nga kongresista sa Quezon City ang ilang anak nga si Ralph.

Ang pamilyang Revilla anaa pod sa kongreso nga gipangunahan sa ilang amahan nga si senador Bong Revilla, inahan nga si Congresswoman Lani Mercado ug mga anak nga sila si Jolo ug Bryan nga mga nominees sa Agimat Party-list. Ang amahan nga si kongresista Raymond Democrito Mendoza sa TUCP ug anak nga si Samantha nga napiling kongresista sa South Cotabato mag-uban sa Kongreso samtang ang iyang inahan nga si Emmylou Talino-Mendoza napili nga gobernadora.

Ang Ubos Balay Balauranan pangunahan sa umaabot nga Speaker of the House nga si Leyte First District kongresman Martin Romualdez ug asawa niini nga si Congresswoman Yedda Marie mao ang unang nominee sa Tingog Party-list. Giubanan usab sila sa magtiayon nga kongresista nga si Jayjay Suarez ug Alona sa Probinsiya sa Quezon, Horacio Suansing Jr. sa Sultan Kudarat ug asawa nga si Estrellita sa Nueva Ecija ug Florencio Noel and Jaye Lacson sa An Waray Party-list ug distrito sa Malabon. Dinhi maingon nato nga ang ika-19 nga Kongreso kongreso na sa pamilya.