Gasa ang pagka-baga'g nawong

Alang kang Senador-elect Robin Padilla, angayan nga modemiter sa ilang katungdanan kadtong mga opisyales nga gi-imbestgar tungod sa kurapsyon agi’g pagpakita’g delicadeza.  Dugang pa sa semador, mahinungdanon ang “accountability” sa mga nangatungdanan sa kagamhanan.  Ang delicadeza, sama sa pagka-baga’g nawong, hiyas nga makat-onan diha sa panimalay ug sagad gitudlo ug nabatayagan nato sa atong ginikanan.  Daw walay purohan nga mahanaw ang mga baga’g nawong kay kini’ng mga tawhana nagtoo man nga ang ilang pagka-walay ulaw, gasa kanila sa kahitas-an.  Fezteleern!

Lamâ sa pasangil

Hugtanong gipanghimakak ni Customs Commissioner Rey Guerrero ang taho gikan sa Senate Committee of the Whole nga nagtumbok kaniya nga usa sa mga giingon’g protector ug smuggler sa mga produktong agrikultura.  Tinuod nga masayon ang pagpasangil apan malisod ang pagpamatuod.  Apan ginaingon usab nga ang tawo’ng sad-an dali ra makadungog sa mga pasangil kaniya.  Dako’g tabaho-on si Customs Commissioner Guererro aron malimpyo ang iyang pangalan.  Kay lage, bisan kadudahan ang pasangil, magbilin man kini’g dili maayo’ng lama sa gipasanginlan.  Limod pa more!

Amendahon ang balaod?

Maghimo’g mga interventions and Department of Agriculture aron matubag ang padayong pagsaka sa presyo sa mga poultry products.  Gihulagway sa DA nga sama sa espada nga duha’y suwab ang maong isyu tungod sa taas nga panginahanglan nuntan sa ka-diyotay sa suplay.  Dili masulbad ang maong isyu pinaagi sa pagsige’g pagarpar sa media.  Angayan ipunting sa DA ang intervention sa pag-atiman sa tinubdan sa suplay.  Kon dili maatiman, bisan mosugyot pa sila nga amendahon ang “Law of Supply and Demand”, magpabilin gihapon ang maong suliran.  Pagkatoytoy!

Pagsalmot o pagbugal-bugal?

Sa gipanglantawan nga pagdominar unya sa “super majority” bloc sa ika-19 nga Kongreso, mipadayag si Party-list representative Rowena Guanzon nga karon ang tukma’ng panahon nga mahimo siyang kabahin sa minority bloc isip mga fiscalizer.  Tinuod nga sa usa ka demokratikanhong kagamhanan, mahinungdanon ang pundok sa oposisyon.  Apan ang naghinobrang pagsupak bisan dili makatarunganon, makahugno usab sa mga paningkamot alang sa kalambuan.  Hinaut nga kaayohan ang ipatigbabaw sa tanan lakip na sa oposisyon.  Kay ginaingon nga, “Gamay ra ang kalainan sa pagsalmot sa diskusyon alang sa kalambuan ug sa pagbugal-bugal”.  Baya no!

Goodbye City Hall!

Gipahibalo na ni Cebu City Mayor Mike Rama nga adunay mokabat 500 ka casual ug job order worker sa City Hall nga dili ma-renew sugod karong Hulyo 1, 2022.  Nakab-ot ang maong hukom human sa makuti’ng evaluation.   Ang gisangputan sa 500 ka trabahante sa city hall, bisan sakit sa hingtungdan, dili angay ikatingala kay dugay na kini gipahibawo sa mayor.  Malisod ang walay trabaho kay dili ka masayod kon kanus-a ka moundang.  Matud pa sa akong amigo, resulta ang pagkataktak tungod sa katapolan. “Kon walay job, mangita’g job; pero kon naa na’y job, dili pud job-on”.  Tua ra!