EDITORYAL - Solusyon nga kutob ra sa papel

Climate change. Pirmeng unod sa mga balita ilabi may kalabotan sa mga kalamidad nga miigo sa mga lugar bisan asang bahina sa kalibotan.

Apan giseryuso ba kini sa mga gobiyerno? Pagkatinuod, wala kini seryusoha bisan sa mga naglingkod nga mga opisyales sa gobiyerno, lokal man o nasudnong level.

Makita kini sa kahimtang sa kadagatan sa Pilipinas. Daghang basura ug bisan sa kadalanan daghang natipun-og nga mga basura, malata ug dili malata.

Padayon ang paggamit og fossil fuels sama sa coal ug petrolyo. Pipila lamang ang mga renewable energy sources nga gi-tap aron kakuhaan og enerhiya alang sa panginahanglan sa nasud.

Ang tanan padayong nagsalig sa petrolyo nga sunogon nga nagmugna og aso nga nakatampo sa global warming ug niresulta sa climate change.

Ayha lang kini hisgotan kon aduna nay natabunan sa nidahiling bukid o flashfloods. Apan kutob ra og hisgot, walay aksyon nga gihimo nga magmugna og dakong kausaban.

Sa matag balikbalik nila og hisgot migasto ang gobiyerno og kwarta apan kutob ra gyud sa papel ug walay implimentasyon. Walay dagkong dautang epekto ang mga natural nga katalagman, kana kun ang tanan naglihok pagpugong o pagpamenus sa epekto niini.

Usa niini ang epektibong pagkontrol sa polusyon nga kaniadto pa maoy gibasol nganong nausab na karon ang dagan sa panahon.

Ang labing sayon nga paagi mao ang pagpananom og daghang mga punoan sa kahoy sa palibot ug sa kabukiran nga nangaupaw na tungod sa illegal logging.

Kini maoy labing sayon buhaton, mahimo rang i-tap ang kabataan pinaagi sa tanang mga eskuylahan, mga out of school youth pinaagi sa mga Sangguniang Kabataan.

Mas maepektibo kini kun himoan og balaod nga himoong rekisitos para sa tanang Pilipino ang pagtanom og kahoy.

Hugot nga pagpatuman sa Solid Waste Management Law, mga pollution control laws, pagpangita og alternatibo sa fossil fuels ug petrolyo pinaagi sa renewable energy sources.

Ang kaugmaon sa kalibotan anaa sa mga kamot sa henerasyong buhi pa karon. Makita unta kini sa tanang kasamtangang naglingkod nga mga lider sa kanasuran.