EDITORYAL - Green energy Philippines, puwede?

Ang labing maayong ehemplo sa mga kausaban dinhi sa nasud kinahanglang magsugod diha mismo sa gobiyerno. Ang gobiyerno adunay gahom pagpatuman og mga dagkong kausaban, bisan pa og dunay mga mosupak kun kini makaayo sa kinabag-an.

Ug mahimo nila kining sugdan sa problema sa enerhiya sa nasud. Kun dunay sakto o naghinobrang supply sa kuryente daghang mga dagkong kausaban nga makabenepisyo ang tanan hasta ang mga kabus.

Ang nasudnong kagamhanan kinahanglang mopokus sa pagpangita og abundang supply sa kuryente nga di kinahanglang gamitan og petrolyo tungod kay dili niini kontrolado ang presyo sa merkado sa lana.

Ang umaabot nga administrasyon ni president-elect Ferdinand Marcos Jr. kinahanglang moseryuso pagpangita og sources sa enerhiya gikan sa renewable energy. Dunay solar, hydro, geothermal, wave, ug uban pa nga mahimong gamiton.

Pagsanong usab kini sa Pilipinas sa kampanya sa kalibotan nga mamenusan ang epekto sa Climate Change.

Di kinahanglang mogasto og dako ang gobiyerno alang niini, ang ilaha lang nga mangita og mga posibleng tinubdan aning maong mga enerhiya ug isugyot kini ngadto sa mga pribadong electric power companies.

Aron maagni sila, tabangan sila sa seguridad, pagkuha sa mga legal nga dokumento, paghatag og permits ug uban pa aron matukod ang pasilidad.

Kun mahitabo kini siguro nga mous-os gyud ang presyo sa matag kilowatt hour sa konsumo sa kuryente sa mga konsumidor. Makahigayon na sab nga palambuon ang sektor sa agrikultura gamit ang maong teknolohiya.

Mahimo sab nga makabutang og mga pangpubliko ug pribadong charging stations para unya sa electric vehicles sa publiko ug makaagni kini og bag-ong kompetisyon sa mga carmakers nga mosagop sa green power. Kun daghang kompetinsiya, mobarato ang ilang mga sakyanan.

Gawas pa mahimong padaghanon sa gobiyerno ang mga railways system nga mogamit lang og kuryente nga magkonektar sa mga rehiyon ug probinsya sa Luzon, Visayas ug Mindanao. Mahimo kini pinaagi sa public-private partnership (PPP).

Mahunong na kining mga transport strikes nga pirmeng maka-hostage sa mga sumasakay matag mosaka ang presyo sa petrolyo. Kinahanglang buhaton sa gobiyerno ang tanan aron kini makab-ot kay dili man kini imposibleng buhaton, ang gikinahanglan lamang mao ang political will sa kasamtangan ug sa mosunod nga mamuno sa nasud.