Dugang sa bug-at

Nagkalainlaing grupo sa transportasyon ang miduso sa ilang petisyon sa buhatan sa Land Transportation Franchising and Regulatory Board (LTFRB) nga nangayo og P2 nga pletihan tungod sa paggamay sa ilang kita mugna sa padayon nga pagsulbong sa presyo sa mga produktong petrolyo.

Dinhi sa Sugbo bugtong lang ang Piston ang wala moapil sa nangayo og usbaw sa pletihan tungod sa rason nga makadugang lamang kini sa gibug-aton nga gipasan sa mga sumasakay.

Ang LTFRB wala pa motakda og adlaw aron tukion ang petisyon sa grupo sa transportasyon.

Sakto ang baruganan sa Piston sa wala pag-apil sa pagpangayo og usbaw sa pletihan tungod kay maghatag lamang kini og dugang kasakit ug kabug-at sa gipas-an nga kalisdanan sa mga kabus nga sumasakay.

Ang pag-usbaw sa pletihan dili makatabang sa mga driver ug sa mga operator sa mga sakyanang de pasaheroan tungod kay makapaminus kin isa ilang sumasakay ug kita kay ang mga dili makaplete magbaktas na lang. Gawas niini, inay panggaon sa grupo sa transportasyon ang ilang mga sumasakay, ila na hinuon kining gitabangan sa pagduot aron kini masukarap tungod sa kabugat na sa kasakit nga ilang gipasan.

Ang mahitabo kun uyonan sa LTFRB ang gipangayo nga usbaw sa pletihan ang mga kabus lang nag-unay ug nagpasahay sa kalisdanan.

Sugyot nako sa grupo sa transportasyon nga awhagon niini ang gobiyerno nga palapdan ug ayohon ang sistema sa pagpanghatag sa ayuda ngadto sa mga drivers aron dali nilang madawat ang fuel subsidy.

Ang angayan nga himuon sa grupo sa transportasyon mao ang paghimo og representasyon ngadto sa gobiyerno aron awhagon kini nga ang ihatag nga fuel subsidy ngadto kanila moagbat o makaagbat sa nawagtang nilang kita sa matag adlaw nila nga pagbiyahi tungod sa pagsige og saka sa presyo sa produktong petrolyo.