Food security dakong hagit
Gipahibawo ni incoming president Ferdinand "Bongbong" Marcos Jr. nga di niya itugyan sa lain ang Department of Agriculture.
Siya mismo maoy mangunay pagdumala sa maong departamento aron mahatagan og dinalian nga tubag ang problema niini.
Admitido ang sunod nga presidente sa nasud nga dako ang problema sa industriya sa agrikultura hinungdan nga gusto niyang pangunayan sa pagtagad.
Husto ang gihimo ni Marcos ug hinaot mao ni sinugdanan sa katumanan sa iyang saad atol sa kampanya nga himoong barato ang presyo sa bugas--P20/kilo.
Ang maong lakang nagpakita sa iyang "political will" nga matuman ug makab-ot ang iyang pangandoy alang sa nasud.
Hinaut lang nga wa nay politika nga mopasuwabi sa pagpatuman sa mga programa sa agrikultura.
Kritikal ang departamento sa agrikultura sanglit iyang trabaho ang pagsiguro nga dunay igo nga supply sa pagkaon ang nasud.
Atubangan sa kalibutanong krisis nga atong giatubang karon dakong hagit sa maong departamento unsaon pagsiguro nga dunay igong supply sa pagkaon.
Dili paigo ang abot sa atong mga mag-uuma aron ipakaon sa tanang Pilipino busa kinahanglan nga moimport og bugas ang Pilipinas gikan sa laing mga nasud.
Ug tungod sa paghuyang sa presyo sa atong kwarta ingon man sa way puas nga umento sa produktong petrolyo seguradong apektado ang presyo sa pagkaon.
Wa pay labot ang pagsulbong sab sa presyo sa abuno nga nagsilbing dakong kalbaryo sa atong mga mag-uuma.
Kini ug daghan pang problema sa agrikultura ang atibangon personal ni Marcos.
Ang nakaayo nga siya maoy mangunay pagdumala mao nga siya maoy direktang manubag sa publiko sa higayon nga dunay palpak.
Dili siya makapamasangil og laing tawo kun siya mapakyas pagpalambo sa atong agrikultura.
Masaligon hinuon ko nga ubos sa pagdumala sa presidente mahatagan na sa hustong pag-atiman ang agrikultura nga napasagdan sa daghan na nga mga nangagi nga administrasyon.
Usa sa angayang hatagan og prioridad sa kagamhanan mao ang pagpasar sa land use act aron mabadlong ang pag-convert sa mga agricultural lands ngadto sa mga subdivision.
- Latest