Nag-abot ang pulos gahi

Nagmagahi sa iyang gibarugan si Cebu Governor Gwendolyn Garcia mahitungod sa iyang gipagawas nga Executive Order Numero 16 nga gipalig-on sa Hunta sa lalawigan sa Sugbo pinaagi sa paghimo niini nga ordinansa diin giingon nga dili na ipugos sa pagpasulob og facemask sa mga pang publikong lugar apan pabilin nga gimando ang pagpasul-ob og facemask sa mga sirado nga mga lugar.

Ang EO sa gobernador nga gipaligon sa ordinansa nga gipalabang sa mga sakop sa Hunta sa lalawigan sa Sugbo wala ilha sa Department of Interior and Local Government, Department of Justice ug Department of Health tungod kay nakalapas kini sa lagda ug patakaran nga gipatuman sa Inter -Agency Task Force.

Ina kay magpagahiay, nganong dili na man lang magsabot ug mag istorya sa suliran ug mag abot sa tunga? Ang problema kay pulos tag-as og garbo ang mga opisyal nga nalambigit sa isyu. Ang DILG, DOJ ug DOH labing siguro dili moduko kang Governor Garcia tungod kay ubos ra ugod nila si Garcia. Ang gobernador dili pod moduko ngadto sa DILG, DOJ ug DOH tungod kay mas nakahibawo pa siya kay kanilang mga ahensiya sa gobiyerno mahitungod sa features sa Sugbo.

Sugyot nako sa tulo ka ahensiya sa gobyerno, makig istorya sa gobernadora kay basin makatabang pa kini sa pagpahilom sa isyu.

Basin pa diay og sa ilang pag pakig-istorya sa gobernadora ilang masabtan ang baruganan niini mahitungod sa pagkamahinungdanon sa pagpaangat sa ekonomiya kay sa pag-insister sa pagpasulob og facemask nga bisan gani silang mga opisyal dili naman pod magsul-ob og facemask kun mag-istoryahanay nga sila lang sa mga pangpublikong lugar.

Sila nasayod nga ang sulbad sa suliran mao ang pagpakigsulti. Ingnon ta lang nga ilang anak ang gobernadora nga angayan nga istoryahon mahitungod sa ilang gilalisan nga EO ug ordinansa.