Salamat Mayor Mike

Akong day’gon si Cebu City Mayor Michael Rama kay gimandoan niya ang kapolisan nga dili lang kaayo estriktohon ang mga tawo kon masakpan sila nga wa magsul-ob og facemask sa mga open areas.

Husto usab kaayo ang kamandoan ni Mayor Rama sa kapolisan nga imbes mohingusog sila sa paghimo’g kampanya batok sa mga wa mag-facemask, mas maayo pa nga ang hingusgan ang pagpatrolya.

Ako di man ko magsul-ob og facemask kon naa sa mga open areas, ug bisan mga polis, daghan ko og nakit-an nga wa na mag-face mask kay nabakunahan na gud ta. Unsa man diay pulos niadtong pagpabakuna nato.

Ang angay’ng patrolyahan sa kapolisan mao ang mga kriminal, mga tulisan kay karong panahona nga misaka na pag-ayo ang prisyo sa fuel products ug mosunod pag-usbaw ang prisyo sa mga palaliton, modagsang ang mga pagpanulis ug pagpangawat.

Sayonan ka nga gamay na lang gyud ang kuwang, ug tag P100 na ang kada litro sa krudo ug gasolina. Maayo gani ko kay dunay mibaligya nako og barato kaayo, tag P50 ra ang litro.

* * *

Daghan diay karon ang nabiktima sa mga tawo nga nagpatoong may koneksyon sila sa MCWD, ug sila kuno ang molihok aron ma-approve dayon ang application sa pagpakonek og linya sa tubig, apan kon makuha na nila ang kwarta gikan sa mga gustong pagpakonek, di na pakita.

Awhag nako kaninyo nga ayaw pailad. Giingnan ko ni ma’am Edna Inocando, ang corporate communications manager sa MCWD, nga wa gyud sila’y gitahasan nga moanha sa kabalayan ug manghatag og application forms sa gustong pagpataod og linya, unya mokolekta og bayad.

Daghan kaayong modus sa pagpangilad aron makakwarta karong panahona, mao nga ayaw gyud pailad. Tingali, ingnon ra mo nila nga tua na sa MCWD ang inyong applications, apan gilabay ra tingali sa basurahan ang inyong application, ug ang kwarta, aw, tua sa pitaka nila.

* * *

Dunay mga gwardiya nga gisweldohan ang Kapitolyo aron nga ang ilang kayutaan sa bukid sa Barangay Apas, dili katukoran og kabalayan sa mga squatters.

Ang mga guwardiya anaa magpahimutang sa karsada dapit sa Sitio Lower Panabang sa Barangay Apas, ug sa unahan nga bahin sa GMA7 Complex.

Wa kaha mag-usik-usik lang ang Kapitolyo sa gisweldo niining maong mga guwardiya? Nganong daghan man lagi gihapong nakatukod og mga balay sa yuta sa Kapitolyo?

Wa kaha ni sila mangwarta lang, apil ang mga gitugyanan diha sa Kapitolyo nga mohatag kunohay og permit? Palihug, Governor Gwen Garcia, tan-awa kining maong punto nga akong gihisgotan.

Maayo pa’g wad-on na lang nang mga gwardiya, mao ra gihapon.