Way respeto

Niadtong Hunyo 8 ning tuiga mipagawas og Executive Order Number 16 si Cebu Governor Gwendolyn Garcia nga nagmando sa paghimo na lamang optional ( sul-obon o dili ) ang facemask sa mga abli nga lugar ug mandatory (pugos gihapon ) sa mga sirado nga lugar. Kining maong kamandoan sa gobernadora gihimo niya nga epektibo dayon.

Rason sa gobernador, daghan nang dagkong  nasud sa kalibotan ang wala na magpugos sa ilang katawhan sa pagpasulob og face mask.

Sigun sa akong pagpanukidoki, ang South Korea, France, Denmark, Iceland, Finland, Norway and Sweden, Bulgaria, Hungary,Poland, Romania, Slovenia, Croatia, Czech Republic, Estonia, Ireland, Netherlands ug United Kingdom wala na magmando sa ilang katawhan sa pagpasulob og facemask sa mga pang publiko nga dapit sugod niadtong buwan sa Marso.

Apan si DOH Undersecretary Maria Rosario Vergerie miingon nga sa ilang pagpangonsulta sa mga eksperto kini miingon nga kasagaran sa mga nasud nga wala na magmando sa pagpasulob og face mask misaka og balik ang ilang mga kaso sa COVID-19. Sa Pilipinas, sa Quezon City ug Metro Manila misaka pagbalik ang mga kaso sa COVID-19.

Si DILG Secretary Eduardo Ano wala moila sa Executive Order ni Governor Garcia tungod kay wala kini masubay sa lagda sa IATF hinungdan nga iyang gimando sa kapolisan ang pagdakop  niadtong mga tawo nga dili magsulob og facemask.

Apan giinsister sa gobernadora nga may gahom siya sa pagpakanaug sa kamandoan basi sa Local Government Code nga naghatag og gahom sa mga local nga opisyal aron mapatuman ang mga emerhensiya nga measures. Apan ang paghimo nga optional sa pagsulob og face mask sa mga abli nga lugar ug pugsanay sa mga serado nga lugar wala ikonsiderar nga emergency nga measures.

Dili ikalimod nga adunay otonomiya ang mga local nga kagamhanan apan dili usab ikalimod ubos sila sa heneral nga supervision sa Presidente sa Pilipinas nga si Rodrigo Roa Duterte kinsa mao usab ang Chairman sa Inter-Agancy Task Force (IATF).

Kun kombinsido ang gobernadora nga wala na kinahanglana ang pagsulob og facemask sa mga abli nga dapit, iya kining isugyot sa IATF ug huwaton ang ilang hukom dili kay mag una-una kun may respeto siya sa IATF ug ni Presidente Duterte.