Harry motrabaho bisag way suweldo

Giklaro ni kanhi presidential spokesman Herminio ‘Harry’ Lopez Roque Jr. nga andam siyang motabang ni Vice President-elect Inday Sara Duterte-Carpio kutob sa unsay iyang mahimo sa higayon nga maaprobahan na sa Commission on Appointments ang pagka Secretary sa Department of Education (DepEd) niini, diin wala pa gani makalingkod, gisaway na ni Senador Riza Hontiveros, kinsa wala botari sa mga BBM-Sara Uniteam supporters sa miaging piniliay.

Sugod niadtong pagpangampanya hangtod karon, paboritong isul-ob ni Harry ang berdeng sinina, timaan nga duol sa iyang dughan si Inday. Walay lipodlipod, gipadayag ni Harry sa social media ang kasuod nilang managhigala.

Busa, tiyempo sa panginahanglan, bukas kanunay iyang kasingkasing pagtabang sa in-coming DepEd secretary, kinsa sa hilom, nakapabuhat nag usa ka matahom-modernong library didto sa Davao City panahon sa iyang termino pagka mayor.

Mga maayong buhat ni Inday wala ipublikar sa mga bias mainstream media, kinsa klarong mga anti-Duterte. Maayo gani, may tabiang social media nga kaantigong motug-an sa tinuod ug mipublikar niini.

Ang banggiitang abogado Harry Roque, kinsa nakatudlog constitutional law ug public international law sa University of the Philippines, College of Law sulod sa 15 ka tuig ug miyembro sa Advisory Council of the Asean Society of International law, diin na-presidente pagka 2018-2019, dako kaayog ikaabag ni Inday sa iya unyang pagpanimon sa DepEd.

Pangandoy ni Harry nga makigtambayayong siya ni Inday sa pagmugnag mas mga epektibong pamaagi sa edukasyon dili lamang alang sa mabulokong kaugmaon sa iyang mga anak ug apo. Kondili, para sa tanan gayod.

“Maski walang suweldo. Maski ako hindi kilalanin. Dahil ako na man po ay may dalawang anak at magkakaroon nang apo, interest ko rin po na ma-improve talaga ang educational system natin.”

Mapaubsanong pamahayag ni Harry.

Pamahayag nga nakapatandog sa dughan sa iyang minilyong dumadapig, kinsa naglibog-nadismaya nganong wala makadaog sa eleksiyon kining tawo nga bisag napilde ug dili mahatagag posisyon sa gobiyerno sulod sa usa ka tuig, andam gihapong mosilbe sa katawhan bisag walay suweldo.

Dinhi gimatuod ni Harry ang panultihon: “A friend in need is a friend indeed.” Diin, gitanyag kinatibuk-an niyang kaalam dili lang kutob ni Inday. Kondili, kanatong tanan! Pagkatahom nga kinaiya. Kapanaminan!