EDITORYAL - Kinahanglan pa ba ang facemask?

Samtang tinuod importante kaayo nga depensa batok sa mga sakit nga makuha gikan sa hangin sama sa Coronavirus Disease (COVID-19) ang pagsuot og facemask, apan dili tanang panahon kinahanglang magsuot niini.

Kanang naa sa gawas sa balay sama sa parke, baybayon, kalibonan, kalasangan o bisan asang lugar nga walay laing tawo o gamay ra gyud kaayo ang mga tawo, mura og dili na praktikal og magsuot niini.

Importante kaayo sa tawo ang preskong hangin maong kahigayonan na nga makahanggab niini ilabi na sa mga taga siyudad. Lahi ra pud kaayo kun ang tawo magsige gihapon og suot niana bisan og siya rang usa naglakaw sa baybayon.

Walay gustong magkasakit, samot na kun COVID-19 tungod kay nasayod na ang tanan kun unsa kahasol para kanila ug sa ilang pamilya kun mapositibo niini gumikan sa mga home isolation, quarantine ug uban pa.

Maayo kining gipagawas nga bag-ong executive order ni Gob. Gwendolyn Garcia nga dili na himuong mandatory ang pagsul-ob niini kun mogawas sa balay basta dili lang sa mga nagdasok ang mga tawo.

Ang mga publikong lugar nga kinahanglang magsuot og facemask mao ang merkado, buwangan, simbahan, mga eskuylahan nga kuwang og bentilasyon, mga conference halls nga kuwang og bentilasyon, hospital, klinika ug mga medical laboratories.

Isip responsableng tawo ug nagpakabana sa uban ilabi na sa ilang mga kabanay nga nahibilin sa balay, may bakuna man o wala, sila na mismo maoy mosiguro sa kaugalingong proteksyon.

Kun sa ilang tan-aw kinahanglang magsuot og facemask o dili sa mga dapit nga ilahang adtoon. Angay managana kay basin og makakuha hinuon sa maong sakit ug madala kini sa ilang panimalay unya matakdan ilang mga minahal sa kinabuhi.

Dili naman gani unta kinahanglan sitahon sa mga otoridad ang mga tawo kun sila nagmatngon sab sa ilang kaugalingong proteksyon.

Panahon na karon nga ang publiko maoy hatagan og responsibilidad n pagsiguro sa ilang proteksyon ug dili lang pirmeng mag-agad sa mga restriksyon nga gimando sa gobiyerno.