Tinuyo man o wala tuyoa, dunay krimen nga nahitabo sulod sa kompaniya

Makapakitbi sa atay nga pangilogan ka sa nahitabo sa usa ka trabahante sa food and beverage company sa dakbayan sa Mandaue nga gilamoy sa sugar pulverizing machine samtang naglimpyo siya niini.

Ang nakaparat kay dili niya kini trabaho kay aduna lang kunoy karaan nga trabahante ang nisugo kang Stephen Corilla nga himoon ang trabaho nga misangpot na hinoon sa trahedya.

Tungod lang ba kay bag-o siya nga trabahante ug sayon sayonon sa pagpahimo sa trabaho nga dili iyaha ug wala gani siya ma-orient sa mga angayan nga pagahimoon samtang naglimpyo siya sa makina.

Pwera sa mga nagtinarong nga karaang trabahante, aduna gyuy mga buloyagon nga mang trip lang sa mga bag-o nga sayon sayonon ra og sugo aron kalingawan lang.

Pangagpas nga posibilidad lang ni ang akong scenario sa nahitabo, posible kaha nga biktima sa power tripping sa senior nga empleyado si Corilla ug gi-bully siya pinaagi sa pagpalimpyo sa makina ug aron mas makontento sa power trip gisuwayan og hadlok pinaagi sa pagpaandar sa makina. Apan wala na mapahunong kay palyado diay ang machine maong nadayonan gyud intawon sa paglamoy ang makaluluoy nga trabahante.

Imposible man gyud kaayo nga nikalit lang og andar ang makina nga walay tawo nga nag on niini, gisugo gani siya sa paglimyo kay naka-off ug wala kini gamita, wala usab kiniy sulod daan nga mga butang nga angayang pulboson.

Siyaro og walay nasayod sa tinuod nga nahitabo niadtong higayona, nganong dili man matumbok sa mga imbistigador kinsa ang nagsugo kang Corilla sa paglimpyo sa makina?

Basin dili lang siya ang nalambigit niini kay naa pud seguroy laing tawo nga ni-on sa makina ug kini ang usa sa tumbokon sa mga otoridad kay siya man gyud ang nakapatay sa trabahante, tinuyo man o wala tuyoa nakapatay gyud siya.

Wala bay CCTV sa sulod sa kompaniya nga makatumbok kinsa ang mga tawo nga naa sa palibot dihang nahitabo ang aksidente? basin naa pero wala lang ipakita.

Mas maayo seguro nga ang kompaniya na ang motugyan ngadto sa mga otoridad kinsa kining mga tawhana kay matud pa nagpahigayon man usab kuno og imbistigasyon ang kompaniya. Duna man gyuy kinabuhi nga nakalas bisan ug moinsister sila nga dili niya direktang kawani si Corilla kay kawani kini sa usa ka job agency. Ang kamatuoran nga namatay ang trabahante sa sulod sa kompaniya sa oras sa trabaho ug ang nakapatay ang makina nga gipanag-iya sa kompaniya busa dili sila makalusot sa ilang tulobagon sa balaod.

Dili lang ang kondisyon sa trabaho kon dili ang nahitabong krimen sa sulod maoy tukion ug sulbaron sa mga otoridad. Klaro kaayo nga naay nahitabong krimen tinuyo man o wala tuyoa, kinsa ang nagsugo, kinsa ang nag-on sa makina. Kong matumbok ni nila mas maayo aron mapanubag sa ilang gihimo apil na ang kapakyas sa kompaniya sa pagpatuman sa kaluwas sa ilang mga trabahante. Hinaut mahatagan og hustisya ang nahitabo kang Stephen Corilla ug dili na usab kini mahitabo sa uban.