EDITORYAL - Protektahan ang local farmers

ANG agriculture sector ang isa sa nakikitang mag-aangat ng ekonomiya ng bansa. Simple lang ang dahilan, sa sector na ito nagmumula ang pagkain. Kapag hindi naalagaan ang pinagmumulan ng pagkain tiyak na babagsak ang ekonomiya. Lahat ay nangangailangan ng pagkain. Kaya mapapansin na sa lahat ng sulok ng alinmang bansa sa mundo may tindahan ng pagkain. Ito ang hinahanap ng mga tao. Kapag walang pagkain, hindi mabubuhay ang tao. Nakadepende lagi sa pagkain ang lahat. Kaya nararapat lamang na ang maging prayoridad ay ang pagpapabuti sa pinanggagalingan ng pagkain. Nararapat na maparami ang pagkain. Ang mga mauunlad na bansa sa mundo ay nag-i-invest nang malaki para sa produksiyon ng pagkain. Kaya naman walang nagugutom sa kanila. Protektado rin ang mga magsasaka sapagkat kung wala ang mga ito, walang pagkain.

Sinabi kamakailan ni president-elect Ferdinand Marcos Jr. na prayoridad ng kanyang pamahalaan ang food supply. Hangad niyang maparami o mapasagana ang pagkain sa bansa sa panahon ng kanyang termino. Noong Biyernes, naka-post sa kanyang official social media account na plano niya na magkaroon ng long-term measures sa agriculture sector para mapaunlad ito. Hangarin din niya na mabenepisyuhan ang mga local na magsasaka. Naniniwala raw siya na mapapalago at uunlad ang sector ng agrikultura sa bansa. Ang pagpaparami ng pagkain ang isa sa mga target niya sa mga susunod na taon.

Pinakamagandang gawin ay ang proteksyunan ang mga lokal na magsasaka. Kapag nagawa ito, tiyak na ang maraming pagkain sa bansa. Huwag hayaang makapasok sa bansa ang mga imported agri products sapagkat ito ang pumapatay sa mga lokal na magsasaka. Sa kasalukuyan, dagsa ang mga gulay mula sa China—carrots, sibuyas, bawang, at kung anu-ano pa na nagiging dahilan para malugi ang mga magsasaka ng gulay.

Isa lang ang nararapat gawin, tulungan at protektahan ang mga lokal na magsasaka at sasagana ang pagkain sa bansang ito. Wala nang magugutom at magrerebelde ang sikmura.