Problema masulbad kong seryosohon lang

Kong aksyonan lang  ang problema masulbad man gyud diay labi na kong ang kagamhanan ang mangunay segurado nga masolusyonan.

Sama nalang sa problema sa upat ka mga sitio sa baranggay Labangon dakbayan sa Sugbo nga nakasinati og suliran sa baha nga dili mohubas.

Kini nagrabehan pa gyud dihang dunay giugmad nga proyekto sa usa ka pribadong kompaniya diin ang binuldos nga yuta nakapakipot sa agianan sa tubig.

Kada bundak sa kusog nga ulan didto gyud moadto sa kabalayanan ug dugay kaayo mohubas nga maabtan na gani sa lumot ug gikahadlokan nga nagdala og mga sakit sa katawhan.

Dugay na ang ingon niini nga problema pipila na kuno ka tuig kay bisan mangugat na ang mga molopyo sa paghangyo wala silay mahimo kay lehitimong tag-iya sa yuta ang nag ugmad niini.

Midangop ang mga molopyo kang Konsehal Jerry Guardo nga maoy chairman sa Committee on Infrastructure ug pangulo usab sa flood control program.

Nakig-alayon ang opisyal sa kadagkoan sa pribadong kompaniya ug gipresentar ang sitwasyon sa daghang mga molopyo nga naapektohan sa        proyekto.

Apil sa gihisgotan ang solusyon niini nga mao ang paghimo og kanal o drainage nga kalutsan sa tubig ug diha diha dayon nagkasabot sila.

Tulo ka culvert lang ang nagamit sa city governmenf diin ang pakabkab sa agianan sa tubig ang heavy equipment na sa private company.

Dinhi makita nga dunay mahimo ang mga tawo kong makig alayon sa kagamhanan ug kong seryosohon usab sa gobiyerno ang paglihok sama sa gihimo ni Guardo.

Kining mga negosyante bisan unsa pa sila ka datu ug kompleto sa papeles ang proyekto gikinahanglan pa gihapon sila nga makig alayon sa lokal nga kagamhanan aron hapsay ug walay sabod ang ilang project implementation.

Mao kini ang gahum sa kagamhanan nga dili mahimong tupngan o labwan ni bisan kinsa basta pinasubay lang usab sa lagda sa balaud.

Labaw sa tanan pinasubay sa "pagkatawo" nga magtan-aw sa kaayohan sa mga tawo nga maapektohan sa bisan unsa nga proyekto o programa.