EDITORYAL - Ibutang ang angayan sa trabaho

Duna nay mga gipiling mga kalihim sa kabinete si president-elect Ferdinand “Bongbong” Marcos Jr. nga maoy modumala unya sa mga departamento sa gobiyerno sa mosunod nga unom ka tuig.

Gipaabot nga duna say mahitabo unyang lahugay ug appointments sa nagkadaiyang mga ahensiya ug mga rehiyonal nga buhatan subay sa kagustohan sa presidente. Natural lang kini matag dunay bag-ong molingkod nga pangulo, kinahanglan siya og mga opisyales nga iyang makasinabot ug masaligan nga motuman sa iyang mga kamandoan.

Ang mga opisyal nga pilion ug ibutang sa dagkong posisyon sa nagkadaiyang ahensiya sa gobiyerno sa nasudnon ug sa rehiyonal nga mga buhatan kinahanglang dunay kapabilidad ug kamahoan sa trabahong gitahas kanila.

Kinahanglan nga ang ibutang sa pwesto mao kadtong dunay background ug dili lang basta background kondili duna gyuy abilidad aron dad-on ug palambuon ang serbisyo sa maong mga ahensiya sa gobiyerno ngadto sa publiko.

Dili kadtong mga tawo nga political appointees nga walay kabangkaagan sa trabahong gisangon kanila. Dili kadtong mga tawong gibutang lang sa maong pwesto kay dako og natampo niadtong panahon sa kampanya.

Ang mga posisyon sa gobiyerno dili bayad sa pagtabang sa mga supporters sa panahon sa piniliay, kondili, aron palambuon ug siguraduhon nga mahatag ang serbisyong gikinahanglan sa katawhan.

Naandan naman gud kaniadto pa nga kadtong mga political backers panahon sa kampanya mao may ipamutang sa nagkalain-laing posisyon diha sa gobiyerno, partikular ang mga posisyon sa sibil.

Ang resulta, bisan og walay ayo nga opisyal nakabaton hinuon og posisyon nga dili nila kayang palambuon. Unya tungod sa kadako sa ilang natabang sa panahon sa kampanya, magpangikog na pagtaktak ang presidente.

Sa pika bahin, nagpangulba na sab ang mga kasamtangang naglingkod og tag-as nga posisyon nga tinudlo ni Presidente Rodrigo Duterte karon, kay kun molingkod na unya si Marcos, may posibilidad nga pahulipan siya niadtong iyang mas masaligan o unsa pang rason.