Agriculture Secretary Dar kuyaw

Bisan unsa ka buotan ang Presidente sa Pilipinas, aduna gyoy mga sakop nga makaako sa pagbuling sa iyang kahamili.

Niining bag-o, niining pipila na lang ang mga nahabiling adlaw sa dili pa mo-exit si Presidente Rodrigo Roa Duterte sa Malakanyang, si Department of Agriculture Secretary William Dollente Dar, mihirit pa og usa ka salawayong buhat nga makapabuling sa malinis imaheng gitukod ni Tatay Digong.

Tiaw bay, sa kaabunda sa isda sa Pilipinas, si Dar mipirma’g Administrative Order No. 10-2022 nga nagtugot sa gobiyerno pag-import og 38,695 metric tons nga isda sama sa galunggong, sardinas ug mackerel, nga wala moagi sa hustong proseso?

Haskang dismayaa ni Senador Imee Marcos, chairperson of Senate committee on economic affairs, pagkasayod niining gibuhat ni Dar nga daw paapas transaksiyon sa dili pa mapupos ang termino ni Duterte.

Gikuwestiyon ni Imee si Dar nganong nanglaktod man kini, diin wala gani konsultaha ang National Fisheries and Aquatic Resources Management Council (NFARMC) alang sa maong tumong?

Matud pang Imee: “The DA’s midnight madness goes on, from contriving a shortage earlier this year while a large supply was still in storage to bypassing outright the NFARMC.”

Usab siya midugang: Nga ang panahon sa pagnihit sa isda tapos na.

Nakabalik na tanang mananagat sa normal nilang kapanginabuhian. Ug nganong moisyu pa man kuno ang DA og certificate of necessity to import?

Hinuon, puwerting pangatarongan ni Dar. Iyang gipagawas nga shortage kuno gihapon sa isda ang Pilipinas. Pero hugtanong gisupak ni Imee.  Sanglit, abunda na kita sa isda. Busa, wala na kinahanglana ang pag-import.

Ning wala pagsubay ni Dar sa hustong paagi diha sa iyang pagpirmag Administrative Order No. 10-2022, nakamugna na kinig bating impresiyon nga siya dili usa ka tarong nga mangangalagad. Dapat palawman ang paimbistigar niini sa Senado.

Ug kon mamatud-an nga adunay balaod nga nalapas, dapat pahamtangan sa hustong silot. Kay niini lang paagiha nga hinayhinayng matangtang ang mipilit na pag-ayong korapsiyon sa Pilipinas.

Ning padayong pagpamili ni President-elect Ferdinand R. Marcos Jr. og mga miyembro sa iyang kabinite, unta likayan niya ang mga tawo nga susamag bulok ni Dar. Ngano? Kay ang maong matang sa bulok, kuyaw ug dili masaligan.