Dili makaambas ang sweldo

Sumala sa POPCOM, kasagaran sa mga Pinoy kinahanglan nga adunay duha o tulo ka trabaho aron makasugakod sa kakabos.  Sugyot sa maong ahensiya sa umaabot nga administrasyon ang paghatag og living wage aron masanta ang nagsaka nga poverty incidence sa nasud.  Ang pag-usbaw sa suholan ug pagmahal sa palaliton nahisama sa lumba sa ba-? ug sa kuneho.  Makaapas ang ba-? kon pahunongon ang kuneho.  Sa samang paagi, makaaambas lang ang sweldo kon kontrolahon sa gobyerno ang pagsaka sa presyo sa palaliton.  Karong panahona, mobayad ka na’g 100 pesos sa kanhi-ay’ng 50 pesos nga haircut nga gibayran mo lang unta’g 10 pesos kaniadto sa diha’ng aduna ka pa’y buhok. Fezteleern!

Sayon buhaton, lisod ihimugso

Matud pa sa umaabot nga Finance Secretary nga si Benjamin Diokno, wala matuman sa China ang gisaad niini nga tabang nga puhunan alang sa mga dagkong imprastruktura ubos sa “Build, Build, Build” program sa administrasyon’g Duterte. Maingon nato nga wala mamunga ang gipugas nga politikanhon ug ekonomikanhong liso sa pakighigala nato sa China.   Haum ni’ng ang panultihon nga “dili ma-apsan sa buhat ang tanan’g saad ug panumpa”.  Kay lage ang saad ug panumpa mapaning-ingnan nato sa usa ka bata: sayon buhaton apan lisod ihimugso.  Baya no!

Matinud-anon’g paling-paling

Namahayag ang DOH nga ang pagpahigayon og face to face (F2F) classes makapa-usbaw sa cognitive ug social skills sa kabataan ingon man sa ilang pisikal ug mental nga abilidad. Dakong pagbalitok kining maong pamahayag sa DOH kay supak man sila kanhi sa face to face nga pamaagi sa pagpahigayon sa klase.  Ginaingon nga “ang pagpaling-paling gisagop ug gidayeg pag-ayo niadtong dili maapektohan o mag-antos sa epekto niini”.  Sa laing bahin, ginaingon usab nga “kon buot ka magmatinud-anon, kinihanglan maantigo ka magpaling-paling”.  Way ‘laro!

Insulto nga usbaw

Gihulagway sa AMA Sugbo-KMU nga “insulto” ang 31 pesos nga usbaw sa minimum nga suholan sa Central Visayas kay dili kini makatumbas sa pagmahal sa palaliton.  Dili yano ang hisgutanan sa pagpausbaw sa suholan kay daghan ang angay ikonsiderar kabahin niini.  Kay lage ginaingon man nga “ang pagpausbaw sa suholan sa usa ka mamumuo, nagkahulugan usab sa pagsaka sa palaliton alang sa laing tawo”.  Aron patas, maayo’ng tamdan ang tambag nga “Kon nagpaka-aron-ingnon ang imong agalon nga ta-as ka’g sweldo, pagpaka-aron-ingnon usab nga daghan ka’g trabaho”.  Paleho la!

Gi-dominar sa asawa

Gitun-an sa umaabot nga administrasyon ang pag-amendar sa EPIRA law sa tuyo nga mapa-ubos ang bayronon sa kuryente.  Daghan na’ng pagsuway ang gihimo sa nangagi sa pag-amendar sa maong balaod apan walay usa niini nga milampos.    Sa ubang nasud, ang gobiyerno maoy nagkontrolar sa industriya; sa Pilipinas, ang industriya maoy nagkontrolar sa gobyerno.  Ang nasud nga gidominar sa mga oligarko, sama sa banay diin ang bana, gidomenar sa asawa.  Aron dili maulawan, moinsister kunohay ang bana nga dili siya “YES Man” kay kon moingon kuno ang iyang asawa nga “NO”, mo-NO man usab kuno siya. Pagkatoytoy!