Pildero dili kapugong sa proklamasyon ni BBM

Human na ang Mayo 9, 2022 nga eleksiyon. May presidente sa Pilipinas nang midaug, si kanhi Senador Bongbong Marcos (BBM), kinsa nakaanig 31 milyones kapin nga botos batok sa nagsunod nga kaatbang, Leni Robredo nga nakahipos lamang og 14 milyones kapin.

Kahinumdoman, mga tadhang Leni supporters nagpulipulig payil og daghang petisiyon didto sa Commission on Election (Comelec) para i-disqualify ang pagkandidato ni BBM kay ingon sa ila nang pagahikit-an ang kainilog ni BBM ning maong panagsangka.

Kompleto sa mga lehitimong dokumento ang kampo ni BBM.

Pagmatuod nga wala siyay kalapasan diha sa iyang pag-aplay og Certificate of Candidacy (COC) sa miaging tuig.

Kaso sa tax evasion? Non-filing of Annual Income Tax Return? Ug uban pa?

Hagbay ra kining nadesisyonan sa Court of Appeals pabor ni BBM.

Gani, niadtong tuig 2016 naaprobahan man sa Comelec ang gipayil niyang COC ug tawhay kaayong nakalansar pagka bise presidente batok ni Leni ug sa ubang mikandidato. Nga sa ato pa, may precedent nang milimpiyo sa ngalan ni BBM. Ug nganong ning pagkandidato niya pagka presidente, ipa-disqualify na man sab siya sa mga hawod?

Dili ba, ang pagsang-at ug samang reklamo, diin may Court of Appeals’ decision na kaniadto, dakong insulto sa maong ahensiya? Sanglit, nahisama na man hinuon kini sa plakang buak, diin bisag unsaon pa pagpabalikbalik pagpatokar, ang tuno yabag na kaayong paminawon.

Dapat sa Comelec, i-junk na kini! Ug tuod man, sa wala pa ang May 9, 2022 election, gi-dismissed gyod sa Comelec tanang disqualification cases ni BBM nga gipayil sa mga oposiyonistang grupo tungod kay Comelec walay nakitang merito nga basehan.

Hinungdan, nga bisag naabot na sa lamesa sa kinatas-ang Korte Suprema ang maong samang disqualification cases nga atua na sab isang-at sa mga pilderong dumadapig ni Leni, dili ug dili gayod mahitabo nga mapugngan ang opisyal nga iniphanay sa resulta sa mga balota ug ang pagproklamar sa mananaog nga Presidente Bongbong Marcos didto sa Kongreso ug Senado.

Sanglit ang mandato sa 31 milyones kaping botanteng Pilipino, kinsa maoy lehitimong mipili ni BBM pagka presidente sa Pilipinas maoy ilhong kinagamhanang puwersa nga bisan ang Korte Suprema dili makapanghilabot.

Busa, sa tanang BBM-SARA supporters, Congratulations!