Benepisaryo

Gipakanselar sa mga abogado sa giingong mga biktima sa tawhanong katungod sa panahon ni kanhi Presidente Ferdinand Edralin Marcos Sr. sa Korte Suprema ang sertipiyiko sa kandidatura ni kanhi senador Bongbong Marcos nga maoy nag-una karon sa ihap sa mga nagpapili sa pagka presidente sa nasud tungod sa rason nga konbiktado kini sa kaso nga wala pagbayad sa iyang income tax ug estate tax. Ang kaso sa dili pagbayad sa income tax, kaso kini nga naglambigit og moral turpitude.

Ubos sa balaud ang tawo nga gikonbikto og kaso nga naglambigit og moral turpitude dili na puwede nga makahupot og katungdanan sa gobiyerno.

Ang moral turpitude usa ka konseptong legal sa Amerika nga nag-refer ngadto sa buhat o kinaiya nga grabing nakalapas sa sentimento o gidawat nga sumdanan sa komunidad.

Ang pagpakanselar sa sertipiyiko sa kandidatora ni Marcos gibasura na kini sa usa ka division ug sa kinatibok-ang sakop sa Commission on Elections o Comelec.

May pulos pa ba ang petition sa mga abogado nga klaro na man nga gihatagan og makabungog nga mandato sa katawhan sa nasud si Bongbong Marcos o BBM? Si BBM nakakuha og 31.10 milyones ka botos sa miaging Mayo 9 nga eleksiyon. Hinungdan nga giila na siya karon nga napiling presidente. Layo kaayo niya ang nagsunod nga si Besi Presidente Leni Robredo nga nakakuha og 14.8 milyones ka botos.

Kun ugaling ikanselar sa Korte Suprema ang Sertipiyiko sa kandidatora ni BBM kinsa man ang makabenepisyo? Si Sara Duterte ba nga maoy nag una sa ihap sa mga kandidato sa pagka bise presidente o si Leni Robredo nga maoy nagsunod ni BBM sa pagka presidente?

Duha ka hukom sa Korte Suprema ang motubag niini. Ang kasong Panlaqui vs. Velasco niadtong tuig 2010 ug kasong Maquiling vs. Comelec niadtong tuig 2013.