Wa mosuporta ang amahan sa bata

Dear Atty. Divine,

Mangutana unta ko kun unsaon sa pagpangayo og suporta sa amahan sa akong anak. Duha ka tuig na ang among anak ug wa gyud magsuporta ang amahan niini bisan kon aduna siyay trabaho.

Nagbuwag mi kay naa siyay laing babaye, ang ako lang unta nga mohatag siya og suporta sa bata  kay dili kaigo ang akong sweldo tungod sa abangan sa balay ug pagkaon pa namo ug ang sweldo sa yaya nga mobantay sa akong anak kun ako motrabaho. Unsay angayan nako nga buhaton aron siya mosuporta? Daghang salamat. — Riza

* * *

Dear Riza,

Ang una nimo nga buhaton mao ang pagpadala kaniya og Demand Letter alang sa imong pangayuon nga sustento kun mobalewala lang siya sa imong demand letter, mamahimo ka nga magpatabang sa barangay diin siya nagpuyo aron siya ipatawag. Kun di siya motunga sa barangay, mamahimo ka nga moduol og abogado aron maoy mopadala kaniya og demand letter.

Kun dili gihapon siya motagad sa imong demand letter gikan sa abogado, imo na gyud siyang pasakaan og kaso ngadto sa korte. Mamahimo ka nga mopasaka og kasong Criminal basi sa Republic Act 9262 kon Anti-Violence Against Women and their Children kay ang pagdumili niya sa pagsustento sa imong anak, usa ka kalapasan sa maong balaod ug usa kini ka criminal offense ug mamahimo siyang mapriso kun mapamatud-an. Mamahimo sab nga mopasaka ka og kasong Civil alang sa pagpangayo lang og suporta sa bata og ang korte na ang mopatawag kaniya og  momando kaniya sa paghatag og ayuda ilabi na kon gi acknowledge niya ang bata. Thank you and God Bless! — Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.