Dakong problema

Pagkadako sa problema sa sunod nga presidente sa nasud kay kinahanglang mobayad ta kada tuig og P326 bilyones alang sa utang nato sa ubang kanasuran.

Ngano man? Kay ang utang sa Pilipinas miabot na og P13 trillion. Unsay sulbad niini? Lagmit, mapugos ang atong kagamhanan pagpa-usbaw sa buhis.

Ang laing paagi mao ang pagmenos sa atong gastohan, apan kon himoon kini siguradong maapektohan ang serbisyo sa kagamhanan ngadto sa katawhan.

Kon dili usab kita mamayad sa atong utang, madaot ang dungog sa Pilipinas, ilabi na ngadto sa mga langyaw’ng tigpautang, ug dili na kita sayon-sayon nga makautang sa sunod.

Matud sa usa ka iladong economist nga kinahanglang kada tuig ang nasud magbayad og P144 bilyones sa principal nato nga utang ug laing P181 bilyones alang sa interest.

Pwede man nga menosan ang budget alang sa gastohan sa mga proyekto aron lang makabayad ang nasud sa atong obligasyon, apan bati ang epekto niini kay dili na kita molambo.

Mao nga hugti na lang daan ang inyong mga bakus, kay sigurado nga sa umaabot nga mga adlaw, pausbawan sa kagamhanan ang atong bayranan sa buhis.

Nagpasabot kini nga imposible gyud diay nga wad-on sa kagamhanan ang excise tax sa mga fuel products, kay kon himoon ni, mosamot nga maut-ot ang revenue sa nasud.

Pinaagi gud unta sa pagwagtang sa excise tax sa gasolina, krudo ug ubang petroleum products, makapakunhod kini sa kantidad sa fuel, pero momenus sab ang revenue sa nasud.

* * *

Para nako, ang pagdumala sa nasud sama ra sa pagdumala nimo sa imong pamilya.

Kon magsige ka’g pangutang nga gamay ra ang imong kinitaan, ug dako na kaayo ang imong bayronon, moabot gyud ang panahon nga maglisud ka na pagbayad.

Buyno, mag-ampo lang ta nga ang sunod nga presidente sa nasud, maantigo unta nga mosulbad sa grabeng problema sa Pilipinas.

* * *

Nindot ang plano ni Mayor Michael Rama nga adto sa South Road Properties (SRP) ipahigayon ang Sinulog Grand Parade karong Enero sunod tuig.

Kon madayon ni, dili kaayo makasinati og grabeng problema sa trapiko sa kadalanan dinhi sa Cebu City. Apan ang angay’ng tan-awon mao ang kahimtang unya sa mga tawo.

Kay wa man kaayo’y mga dagkong kahoy sa SRP nga makahatag og landong, dili ba kaha daghan ang makuyapan sa grabeng kainit?

Usa kini sa angay’ng hisgotan pag-ayo sa kadagkoan sa Sinulog Foundation Inc. ingon man ni Mayor Rama. Pero balikon nako nga nindot ang plano sa mayor.