Wad-a ang pagdumot

Pagsuwat nako niining maong lindog kagahapon, wa pay resulta sa eleksyon. Tingali, karong adlawa, klaro na kaayo kon kinsa ang modaog kay nakapagawas na man og pasiunang resulta ang Comelec.

Kaniadtong Domingo sa gabii, nanawag nako ang amigo ko nga opisyal sa Comelec ug nangutana kon kinsa ang mga kandidato nga nabantayan nakong kusog sa mga botante.

Mura’g naglisod ko pagtagna kay pareho man sila nga mga lig-ong kandidato si Mayor Mike Rama, Margot Osmeña, ug bisan na si Konsehal Dave Tumulak.

Ang ubang kandidato hinuon, sigurado na man ko nga dili gyud sila modaog. Para nako, ang away naa ra gyud sa tulo. Sa mga konsehal hinoon, klaro kaayo.

Ang ako lang awhag sa mga modaug nga unta, wad-on ninyo ang pagdumot, ug ipatigbabaw ninyo ang tinuoray’ng serbisyo sa katawhan, bisan pa og sila nga dumadapig sa inyong kontra.

* * *

Wa malilong ang pagpamalit og mga botos sa mga politiko nga gusto gyud nga makadaog. Usa kini sa rason ngano nga lisud kaayo makalingkod og katungdanan sa kagamhanan kadtong mga pobre apan maayo unta moserbisyo.

Dili nako ikauwaw ang pagtug-an nga gusto kong mangalagad sa katawhan, apan ang sistema karon nga daghan kaayong mga botante nga mangita gyud nga sila mabayran, maoy makapawong sa akong tinguha.

Bisan gani ang eleksyon sa barangay, magkinahanglan na og dako kaayong kantidad. Bisan gani dili ka mamalit og botos, dako kaayo og gasto ang pagpangampanya.

Daghang mangayo nga bisan ang ipalit nila’g bugas, mga tambal, ilimnon nga makahubog, hukhokan nila ang mga kandidato. Kadtong mga kandidato nga dili dawo, maoy humot sa mga botante, apan dako ka’g gasto.

Dili tanan sa mga tawo nga nangatungdanan sa kagamhanan nga tinud-anay’ng manerbisyo. Ang gusto nila nga sila mahimong opisyal aron nga tahuron sa katawhan.

Kon gusto pa sila nga manerbisyo, giatiman unta nila ang mga dugay na kaayong mga pundir nga suga sa poste, mga aseras nga hugaw kaayo ug dili na maagian og tawo.

Gusto mo’g sampol? Tan-awa kanang eskina Imus Road ug Sikatuna, kanang gikan ka sa Zapatera Elementary School, wa gyuy nakatagad niana nga mga opisyal nga ang usa ka balay anaa ra gipaagas ang iyang mga hugaw sa aseras.

Ang tawo anaa na moagi sa karsada kay hugaw man kaayo ang aseras. Ang sapa sa T. Padilla, sus, daghan na kaayong mga lapok ug angay na nga habwaan.  Suheto kaayo ko niana kay kanunay ko diha nga mag-anhaan kaniadto. Karon, grabeha, mabaw na kaayo ang sapa. Wa gyuy nakatan-aw niana?

Way mga opisyal sa barangay nga nakahatag og sugyot sa mga taga City Hall?