Pagpakabana liwas sa eleksiyon
Ang eleksiyon karong adlawa nakahimo og kasaysayan. Sa pagpalihok sa kinadaghanan nga mga boluntaryo. Nga nigasto sa ilang panahon ug kuwarta aron pagtabang sa kampanya. Nanuktok sa kabalayan, nagpaprinta og campaign materials, nagpahuwam sa mga sakyanan, namalit og pagkaon para sa ubang mga boluntaryo ug kaliboan ug usa ka uban pa.
Mapili o dili ang ilang mga gipaluyohan human sa iskutenyo sugod karong gabii hangtod sa mosunod nga mga adlaw, ang mga boluntaryo daog na. Importante nga mga pagtulon-an sa talagsaon nila nga kasinatian di na malangkat gikan nila.
* * *
Samtang dunay nawad-an og pipila ka karaang kaila, tanang boluntaryo nakadaog og mas matinud-anon nga bag-ong mga higala. Nga sama nila nagpakabana ug andam nga mosakripisyo. Mahimong padayunon ang pagtuki, liwas sa eleksiyon, unsa pay ilang mahimo para sa nasud ug sa katawhan.
Tungod sa ilang ka-epektibo sa house-to-house, voters education ug mga pulungpulong, makadani sila og mas dakong daghan pa nga naghigwaos sab sa paggakos og kawsa nga mas dako kay ni bisan kinsa. Kon molahutay ang ilang pagpakabana, mas masaaron ang resulta sa umaabot nga mga piniliay.
* * *
Mahimo nilang balikan ang labing kabos nga mga lugar nga ilang naduaw aron katabangan nga masulbad ang ilang kakuwang sa tubig, kabalayan, kadalanan, kanal, panginabuhi ug ubang batakang mga serbisyo sa gobyerno.
Mahimo silang magpadayon og tampo-tampo aron matambalan ang ilang nakaila nga mga masakiton nga mga bata ug dagko, o maka-eskuyla ang mga bata, o maatiman ang dunay mga kaso pero di kabayad og abogado, o matabangan aron nga di mapalayas sa ilang mga pinuy-anan.
* * *
Kinahanglang ipadayon ang ilang nasugdan nga pag-awhag sa mga opisyal sa gobyerno sa tinuoray nga pagserbisyo sa katawhan. Angay’ng iduso ang kampanya batok sa mga pangabuso sa gahom, pangurakot sa buhis ug pataka nga pagdumala.
Hinaut nga nakumbinser na sila nga di kinahanglang magpaabot sa sunod nga eleksiyon aron maningil nga mapakaon ang mga gipanggutom, matambalan ang mga masakiton, mapugngan ang mga baha, matapakan ang mga libaong ug mapatuman ang mas mapuslanong mga proyekto. Hinaut nga nituo sa giangkon sa tanang nangampanya: Nga ang mga mapili maoy mga suluguon; ug nga ang tinuod nga hawod mao ang katawhan.
* * *
- Latest
