Kadaugan sa mga Filipino

Midagsa ang mga tawo sa mga pantalan ug terminal sa dakbayan sa Sugbo sugod pa niadtong hapon sa Biyernes. Hangtod na gani kagahapong adlawa ug naa pa usab karon kay tinguha nila nga makabotar sa mga napili nga kandidato didto sa ilang tagsa tagsa ka mga dapit.

Susama sa mga naandan nga holiday ang bul-og sa mga tawo kinsa mipadayag nga mahinungdanon kaayo nga maapil sa pag-ihap ang ilang boto kay mao kini ang yawe sa kadaugan sa mga napili nilang mga sinaligan nga mamuno sa atong nasod.

Makapatandog baya pamation ang ka matinud-anon sa mga tawo sa pagpanginlabot sa importante kaayo nga kalihokan kanatong mga Filipino.

Sagad sa akong mga naestorya halos managsama ang gipadayag nga panghinaut sa mga mapiling lider sa atong dapit ugaling makalingkod na sa pwesto.

Pagsulbad sa mga problema sa kakabus, paghatag og trabaho sa mga tawo, pag-angkon sa kalinaw ug daghan pa.

Dili na kini bag-o pa nga pangindahay kay mora’g kada eleksiyon naman nato ni gipangandoy, seguro naay natuman apan aduna usay napakyas.

Busa karong adlawa diin isuwat nato sa balota ang mga napili natong kandidato seguroha nga dili gyud nato mahayan ang mamahimong sangpotanan niini kay kabahin kita sa mga panghitabo sa umaabot.

Gawas sa personal nga pangindahay, aduna usab silay gipanawagan karon pa lang nga mao ang kalinaw pinaagi sa pagdawat sa resulta sa eleksyon.

Dili usab kita kabasol sa kahingawa sa mga tawo sa posibleng kasamok nga motumaw sa masig ka kampo ilabi na sa mga supporters nga daan nang nagbukal sa kainit panahon pa lang sa kampanya.

Maangkon lang nato ang kalinaw kon adunay acceptance sa kapildihan ug suportahan kong kinsa man ang makadaug sa eleksyon aron makapadayon dayon sa pagserbisyo sa mga Filipino.

Saulogon nato ang resulta sa eleksyon kay kini ang.kadaugan sa mga Filipno nga maoy tinuod nga bida karon.