EDITORYAL-Pagkabahin-bahin sa mga Pilipino

Dunay mga netizens nga miisa ang kilay sa dihang mipadayag ang mga kaparian ug mga madre dinhi sa Artsidiyosisis sa Sugbu og suporta ngadto kang presidential aspirant Vice President Leni Robredo ug Senador Kiko Pangilinan kagahapon.

Unsa may naa ana? Sa dihang giendorsar si kanhi senador Ferdinand Marcos Jr. ug Davao City Mayor Sara Duterte-Carpio sa Iglesia ni Cristo, duna pay ubang mga relihiyon nga nipagawas sab og endorsement para sa ilang tandem, wala may nagbagulbol sa social media.

Ingon niana na ba gyud ka kalubog og hunahuna ang mga Pilipino karon? Resulta kini sa naghinobrang pagkuyanap sa mga fake news, disinformation ug malinformation diha sa social media.

Una sa tanan, dili ang Simbahang Romano Katoliko maoy nideklarar og suporta sa duha, kondili indibidwal nga mga pari ug madre nga naghugpong aron ipadayag ilang tagsatagsa ka mga baruganan.

Mismo ang Catholic Bishops Conference (CBCP) wala mopagawas og opisyal nga endorsement.  Sama ubang mga Pilipino, mga botante sab ang mga kaparian ug mga madre sama ra sab sa ubang mga organisasyon, mga grupo ug indibidwal nga nisuporta og kandidato.

Kaning tanan bunga sa impluwensiya aning mga political trolls, mga political bloggers sa social media nga mikondisyon sa hunahuna sa mga tawo nga panggaon ning usa ug dauton ang usa.

Sa laktod, sila maoy responsable sa pagkabahinbahin sa mga Pilipino karon. Apan kay lisod man silang patubagon, naa na sa mga tawo ang paggamit sa ilang hunahuna sa paghimo og desisyon.

Sa mga eleksyon karong mga panahona, kun walay kwartang ika-afford ang kandiadato sa mga nasudnong posisyon pagkuha sa serbisyo aning mga troll farms, dako kaayo ang purohang mapildi.

Sud sa nanglabay nga mga katuigan nadiktaran na nila ang panghunahuna sa mga tawo sa kada adlaw nila og posts ug pakatap og mga fake news hinungdan nga nakapaubos sa paminsar sa ubang mga tawo nga gilawgan aning ilang mga impormasyon.