Kandidato ng China: sugo ng komunista
May kandidatong governor sa North Luzon na nais pumasok hindi lang Chinese investors kundi pati People’s Liberation Army sa probinsiya niya. May kandidatang kongresista sa Quezon City na partner ng mga Chinese na nagbenta ng mahal na pandemic supplies sa gobyerno. Kapartido siya ng kandidatong meyor na nagbigay sa Chinese ng minahang ginto nu’ng 2005 maski labag sa Konstitusyon.
Suportado sila ng kandidatong pangulo na malapit sa Chinese Communist Party, kaya ayaw ipagtanggol ang ating pangisdaan kontra sa Chinese fisheries militia. Katambal niya ang nais mag-VP para ituloy ang pagiging masunurin sa Communist China.
Kaalyado nila ang isang dating pinuno na kumontrata sa China nang may kickback na $200 milyon (P10 bilyon). Kaalyado rin ang dalawang kandidatong senador na kunwari’y makabayang estudyante noon pero inaabogado ang China ngayon.
Ilan lang sila sa mga kandidato ng China sa Halalan 2022.
Hindi nakakagulat na pinopondohan sila ng Chinese Communist Party. Ipupuwesto sila ng CCP para isulong ang interes nito—ang pag-agaw ng West at East Philippine Seas. Tinututa rin ng CCP ang mga piling pulitiko sa Australia, New Zealand, Malaysia, America at Africa para ipalaganap nang lubos ang impluwensiya.
Mura lang para sa CCP na magpondo ng traydor. Ang P1 bilyon na pangkampanya ay $20 milyon lang. Gapatak lang ‘yan ng P12 bilyon na kinita ng Chinese at mga kasapakat sa pandemic supplies. Sa ilalim sila ng Chinese state agent na binisto ng Senado.
Maging mapanuri. Huwag ihalal ang kandidato ng China. Walang dayuhan o tuta nito na nagpabuti sa Pilipinas. Nilupig na tayo noon ng Kastila, Amerikano at Hapones. Naghirap, minasaker ang Pilipino. Pag-aawayawayin tayo ng China para makontrol ang ilang probinsiya, bahura, at West at East Philippine Seas. Wawasakin ang ating Republika.
- Latest
