Abusado nga bana

Dear Atty. Divine,

Naa koy pangutana labot sa akong sitwasyon kay ang akong bana grabe kaayo ka abusive ilabi na kun mahubog. Mamun-og siya nako lakip na sa mga bata. Kaniadto nga gagmay pa ang among mga anak di mosukol niya ang mga bata, apan karon nga high school na mosukol na niya ang among mga anak kay pulos man lalaki. Karong bag-o nag-away na sab mi ug ako na gyud siyang gipa blotter kay nabun-og ang akong bukton ug likod tungod sa iyang sumbag ug sipa. Miingon ang akong anak nga wa na gyuy chance nga mausab pa ang ilang amahan busa iyang kong giingnan nga buwagan na ang ilang amahan kay basin og sa sunod nga mag-away mi unya wa ang akong mga anak, mapatay unya ko sa ilang amahan. Naglibog ko kun unsay akong buhaton aron mahunong na ning iyang pagpamun-og? Daghang salamat. — Jessica

* * *

Dear Jessica,

Kanang gibuhat sa imong bana nga pagpamun-og kanimo usa kana ka kalapasan sa balaod ug mamahimo mo siyang ikiha basi sa Republic Act 9262 kon Anti-Violence Against Women and their Children. Di gyud na maputol ang iyang pagpangabuso kanimo kun wa kay buhatong legal. Ang una nimong buhaton mao ang pagpasaka og reklamo sa barangay ug mangayo ka og Barangay protection order aron di na siya makaduol nimo. Mamahimo sab nimo siyang ikiha og kasong criminal tungod sa iyang pag violate sa R.A. 9262. Way katungod ang si bisan kinsa nga mopasakit kanimo bisan pa kun imo nang bana busa kinahanglan nga mahunong na kining iyang pagpamun-o pinaagi sa imong pagpasaka og kaso batok kaniya. Mamahimo ka mga magpa-blotter sa police ug magpa assist kanila sa pag-file sa imong kaso. Lain nimong option mao ang pagpakigbuwag niya temporarily hangtud nga maka realize siya sa iyang binuhatan. Mas maayo sab nga magpa marriage counseling mo aron pagsave sa inyong marriage. Thank you and God bless. — Atty. Divine

* * *

Alang sa inyong pangutana palihug lang sap ag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.