Magsige nalang ta og booster ani?

Gisugdan na sa kaulohan ang second booster shot alang sa mga vulnerable sector labi na sa mga immunocompromised nga tawo sa tinguha nga seguradong mapanalipdan gyud batok sa kabangis sa COVID-19.

Matud sa mga experto sa panglawas nga magkahuyang ang epekto sa bakuna kong magkadugay busa gikinahanglan nga adunay booster shot. Pastilan magsige nalang ta og booster ani mora og sakyanan nga magsige og patubil sa gasolina.

Abi man nako og ok na ta kong mabakunahan kausa hangtod kaduha. Apan gikinahanglan pa gyud diay nga katulohan sa gitawag og booster, karon naa na sad ang second booster nga mao ang ikaupat.

Wala man kaayo koy hanaw mahitungod niining isyuha kay dili man ko doktor maong daghan kaayo nga mga pangutana ang mitumaw sa akong hunahuna karon.

Kaniadto nagpanikad ko magpabakuna hangtod na gani sa pagpa booster apan sa bag-ong kalamboan nga naa na puy laing booster mora’g naglibog na ko nga naay mga moturok nga pagduhaduha.

Unsa man gyud makapanalipod pa gyud kining bakuna kanato? Siguro mapanalipdan kita sa unang hugna ug sa follow up niini apan sigurado ba gyud kaha sila nga wala kiniy long term effect kong magsige nalang kita og dawat sa bakuna sa lawas kay lagi gikinahanglan nga palig-onon og balik ang atong lawas kay ang mga naunang bakuna nga atong nadawat naluya na.

Daghan na ang mga mikwestyon sa una pa lang nga pagpatuman niining bakuna batok sa COVID-19 kay dali ra kaayo kini namugna ug nakwestyon gani ang ka epektibo ug ang peligro nga mamugna kay dinalidali tungod lagi usab sa tinguha nga masumpo ang virus.

Kining pagpahigayon og booster shot naapil ba usab kini sa ilang pagpanukiduki dihang gimugna ang bakuna? Pangutana lang kining akoa sama sa uban. Dili ko supak sa bakuna pero kong magsige nalang og dawat ang atong lawas sa bakuna, siguro moepekto kini apan sa ngadto ngadto unsa usab kay ang long term effect niini? Basin baya og magsalig na ang atong systema sa bakuna nga murag dili na kita makasugakod kong wala na ang bakuna.

Hinuon ang pagpanalipod sa atong tagsatagsa ka panglawas anaa ra gyud sa matag usa kanato. Kong gusto kita nga modawat og sige sa bakuna go ahead, samtang kadtong adunay kabalaka hunahunaa og maayo kay mao na hinuon kini ang makaapekto sa atong mental health tungod sa kahadlok. Samtang kadtong misalig sa bakuna, sige padayon.

Kita ang labing nasayod kong unsa ang makaayo ug makaadaut sa atong kaugalingon. Hinaut nga dili na ipamugos ang booster shot sa mga tawo ug hatagan kita og kagawasan sa paghukom.