Ulahi ang pagbasol

Hangtud karon, daghan pa gihapon ang wa makasabot nganong dili angay’ng suportahan si Bongbong Marcos sa iyang tinguha nga mahimong presidente kay nagdumili siya pagbayad og Estate Tax ngadto sa kagamhanan.

Ang uban gani nagtuo man nga gihimo-himoan ra kuno’g estorya sa mga kaatbang ni Marcos nga duna kini bayranan aron nga madaot ang iyang pagkatawo. Dili ko mosugyot og kandidato nga inyong suportahan, apan dili lang unta si Bongbong.

Balikon nako nga kon kandidato ka gani pagka opisyal sa kagamhanan, labi na og pagka presidente, matinumanon ka gyud sa balaod. Kini ang hunahunaa ninyo pag-ayo. Kita gani nga mga pobre, mobayad man gani’g buhis, unya si Marcos dili?

Ang pabayran sa kagamhanan ni Bongbong dili ni buhis sa yuta. Ang balaod gud nag-ingon nga kon mamatay ang tag-iya sa property, ang mao nga kabtangan ibalhin kini sa iyang mga sumosunod, ug kinahanglang mobayad og Estate Tax.

Sanglit si Bongbong ug ang iyang mama nga si Imelda mao man ang “court-approved administrator” sa property, obligado siya nga maoy mohimo’g lakang nga mabayran ang P23 Bilyones nga Estate Tax, ug “final ang executory” na ang hukom sa Bureau of Internal Revenue niadtong 1997. Mitubo na gani ang kantidad.

Bisan ang Supreme Court mihatag na og hukom nga si Bongbong obligado gyud nga mobayad sa maong kantidad. Apan unsay gihimo? Hangtud karon nagdumili pagbayad.

Mao kini ang wa nako magustohi kang Bongbong. Ayaw na lang na’ng kaestrikto niya nga dili magpahikap og tawo atol sa iyang mga campaign rally.

Makadaghan na ko makakita nga si Bongbong mismo mowakli sa kamot sa mga supporters niya nga gustong mogunit ug makiglamano. Pag-ari niya sa Cebu adtong miaging semana, mihikap sa bukton ni Bongbong ang usa ka tawo kay mag-selfie unta, apan gikanlat ang iyang kamot sa mga bodyguard.

Nganong ingon man niini ang kinaiya ni Bongbong? Kay anaa pa sa iyang kaisipan ang pagka gamhanan nila dihang ang iyang papa mao pa ang presidente kaniadto sa nasud.

Kon mahimo siya nga presidente, ang mga Presidential Security Group (PSG) nga mokuyog-kuyog kaniya, halos walay makaduol, bisan ang mga sakop sa media.

Dili imposible ang gituohan sa uban nga kon pananglit makalingkod si Bongbong pagka presidente, posible nga sundon niya ang gihimo sa iyang amahan kaniadto nga nagdeklarar og martial law.

Anha na unya dihang higayona nga kining mga tawo karon nga daw “lunod patay” nga milaban ni Bongbong, makiglalis bisan og wa masayod sa tinuoray’ng isyu, magbasol na unya sa kaulahian.

Ang tinuod, naay mga maayo sa ubang nanagan pagka presidente, apan unsaon man, ang katawhan anha man gyud sa tawo nga dili motuman og balaod.