EDITORYAL - Proteksyon sa migrant workers

Usa ka dakong kadaugan para sa mga Pilipinong domestic workers sa banyagang mga nasud ang pagdapig sa korte sa Hong Kong sa Pilipina nga biktima sa pagpangabuso sa ilang mga agalon.

Ang maong kadaogan nagpakita nga dili lang sa aktwal nga paglapas sa katungod sa nahisgotang Pilipina ang naukay sa maong kaso kondili ang mas lapad ug ngil-ad nga kahimtang sa mga migrant workers ngadto sa mga adunahang mga nasud.

Samtang dili man tinuod tanang banyagang mga nasud dili makatarunganon sa mga migrant workers, apan duna gyuy mga lugar nga grabe kaayo kaubos ilang pagtan-aw sa mga domestic workers, Pilipino man o ubang nasyon. Apan ang Pilipinas maoy nag-unang nasud nga ‘source’ sa mga maayong workforce sa kalibotan tungod sa kakugihan, talent ug makamaong mo-Englis, sa propesyonal nga trabaho hangtud na sa mga katabang sa mga balay.

Apan subo kaayo palandungon nga dili tanan kanila nga nanimpalad sa langyaw nga mga nasud ang nagrasyahan. Ang uban nadisgrasya kay natunong sa mga abusadong mga agalon.

Ang mga Pilipinong migrant workers dako kaayo og natabang sa pagpabalanse sa ekonomiya sa nasud bisan dunay mga krisis tungod sa ilang dollar remittances nga moabot og bilyon-bilyon.

Apan kuwang kaayo sila og proteksyon gikan mismo sa gobiyerno sa Pilipinas.

Mura lang sila og gitalu-taloan sa pagtawag kanilang mga “Bagong Bayani” kunohay tungod sa sakripisyong ilang gihimo para sa ilang mga pamilya.

Apan pagkatinuod, dili kini maoy tinuod, wala sila nagpakabayani para sa Pilipinas kondili para kini sa ilang tagsa-tagsa ka pamilya aron sila makasugakod tungod sa kalisod dinhi sa nasud.

Una sa tanan, kun ang mga lider sa Pilipinas nagtarong palang sa ilang trabaho pinaagi sa pagpalambo sa ekonomiya sa nasud ug gibuhat ang tanan aron nga dunay matrabahoan dinhi, walay mga Pilipinong manglanyaw aron lang himuong katabang.

Kini mao untay tan-awon sa mga botante karong  umaabot nga piniliay sa Mayo 9, 2022. Mopili og mga lider nga dunay kapabilidad ug may abilidad para tinud-anay nga haw-ason gikan sa kalisdanan ang kadaghanan sa mga Pilipino. Kadtong dunay track record sa maayong panerbisyo ug makadani og daghang investors dinhi nga makahatag og daghang trabaho para sa mga Pilipino.