Radikal nga panagang sa fake news
Giisip ni Bise Presidente Leni Robredo nga dakong sayop ang iyang pagdumili sa pagtubag sa nagbaha nga fake news batok niya sa niaging unom ka tuig. Naamguhan niya nga di diay paigo ang pagtuman sa iyang trabaho kutob sa iyang mahimo aron pagpahilom sa mga pagsaway.
Nga mao sab tingali ang nahunahunaan ni anhing Presidente Noynoy Aquino. Dihang human sa unom ka tuig niyang pamunoan, nga gitiman-an sa daghang fake news batok niya bisan sa paglambo sa ekonomiya, nipili ang katawhan og presidente nga nibugalbugal, nipapas ug nibalitok sa iyang kalamposan.
* * *
Maong giawhag ni Robredo ang iyang mga dumadapig sa pagtabang niya sa pagbatok sa fake news. Pinaagi sa pagpahibawo dayon sa kamatuoran sa labing daling panahon matag pakatap sa sayop nga kasayuran. Nga mao nay gihimo sa iyang mga dumadapig sukad sa pagsugod sa kampanya.
Pero nisugyot si Robredo og kalainan: Pagtubag sa tanang fake news nga puno sa pagmahal ug pailob. Nga maoy iyang awhag sud na karon sa pila ka buwan. Pero wa tumana sa kadaghanan. Maong iya nang gipangayo nga gasa sa iyang adlawng natawhan.
* * *
Lisod tumanon sa iyang mga dumadapig ang awhag ni Robredo. Nga bisan ang mga pari nga nipirma og manifesto pagsuporta sa iyang kandidatura kuwang og kadasig nga nitubag sa iyang hangyo nga hunungon na ang pakig-away sa social media.
Pero may paagi si Robredo sa pagdasig sa iyang mga dumadapig sa mga maayo niyang sanglitanan. Nga nabantang na sa iyang rallies sa Sugbo ug ubang bahin sa nasud: Dasok pero hapsay, way tudlanay, puno sa pagtinabangay.
* * *
Dihang unang niawhag sa paglusad sa house to house campaign si Robredo ug ang iyang anak nga si Aika, wa sila seryusoha. Gipakaingon sa mga dumadapig og bag-o lang nga slogan nga nahunahunaan. Pero karon mao nay nakit-an nga labing epektibong paagi pagdani og dugang mga dumadapig.
Ang radikal bang pagmahal ang kataposang duso nga gikinahanglan sa pagpadaog ni Robredo karong kapin sa semana na lay nahibilin sa kampanya? Way laing kapilian ang iyang mga dumadapig. Gawas sa pagtuo sa iyang pasalig nga ang pagpakita sa pagmahal, imbes pagsumbalik sa mga binastos ug panginsulto, mas makadani sa dugang mga botante.
* * *
- Latest
