Tingog sa katawhan di kabalibaran
Ang dakong sakripisyo sa katawhan–pagpasinguwan, pagpainit, pagbaktas, pagbarug og pila ka oras ug pagtampo sa gagmayng hiniposan, apiking panahon ug way kinutoban nga talento ug kamamugnaon–ug ang kadasig ug kalunsay sa ilang suporta nilang Bise Presidente Leni Robredo ug Senador Kiko Pangilinan, wa makawang.
Kapin duha ka semana sa di pang piniliay, natay-og na ang mga politiko. Nga napugos lang pag-abiba sa mga piliunon sa administrasyon. Tungod sa diktar sa ilang mga partido. Nga maoy magbuot mabahinan ba sila sa higanteng puntil sa kampanya. Para sa way kinutoban nilang mga gastohan.
* * *
Pero ang labing nakapahasol sa lokal nga mga politiko mao ang kahadlok nga mahimuwag sila sa kinabag-an sa ilang mga botante. Nga mahimong di makapasaylo sa ilang pagpalabi sa kuwarta kay sa awhag sa ilang hunahuna ug kasingkasing.
Sila nga labing suhito sa politika (nigahin sa tibuok kinabuhi aron nga makatungtong sa gahom) nahibawo nga mahimo silang silotan sa nahigmata nang mga botante. Mahimo di karong eleksiyona (tungod sa kakuwang og mga alternatibo). Kon dili sa umaabot nga mga piniliay. Nga mahimong makapahagsa sa ilang politikanhong mga ambisyon.
* * *
Akong nahibaw-an gikan sa mga mayor mismo, o sa ilang mga paryente ug mga lider, nga sekreto silang nitabang sa mga boluntaryo nilang Leni ug Kiko sa ilang mga syudad ug mga lungsod. Nipasabot nga di pa silang kapabantang kay badlungon dayon sa partido ug wa na silay mahimo.
Ilang suporta naglakip sa mga donasyon sa campaign materials ug ubang panginahanglan sa volunteer centers ug mga sakyanan para sa inadlawng rekurida ug sa mga nanambong sa Ceboom! grand rally gahapon.
* * *
May mga mayor sa Metro Cebu nga nakugang pagkahibawo nga mayoriya sa ilang mga barangay kapitan ug mga lider nangampanya para nilang Leni ug Kiko. Nihangyo nga di lang una modeklarar sa publiko. Ug nipasalig nga di badlungon ang hilom nga pangampanya. Nipasalig sab ang mga mayor nga di sila aktibong mangampanya para sa opisyal nilang kandidato pagka presidente. Gawas lang kon pugson na gyod sa ilang partido.
Lisod gyod diayng sukwahion ang kabubut-on sa katawhan. Nabatyagan namong mas daghan nang mga opisyal sa barangay nga nihangop sa among house-to-house campaign ug mga pulungpulong.
* * *
- Latest