Temprano pa

Human sa grand rally sa UniTeam didto sa South Road Properties (SRP) niadtong Lunes, gipahibawo dayon ni Mayor Michael Rama nga adto na himoon ang Sinulog 2023.

Matud sa mayor dako ug haum ang maong dapit alang sa dagkong kalihukan sama sa Sinulog.

Busa matud ni Rama nga angayang sugdan na karon pa lang ang preparasyon alang sa Sinulog sunod tuig.

Way dautan sa pagsugod og sayo sa preparasyon ug gani mao ni angayan ug hustong buhaton.

Apan dako ang preparasyon nga gikinahanglan sa pagbalhin sa venue sa Sinulog.

Ug posibling dako nga kantidad sab ang kinahanglanon pagpatukod og istraktura alang niini sanglit bakanti pa ang luna sa SRP.

Ang eleksiyon nagsing-abot pa og posibling dunay kausaban nga mahitabo sa liderato sa dakbayan human sa Mayo 9.

Kun mapildi si Rama sa eleksiyon dako og purohan nga maanugon ang preparasyon ug gasto tungod kay way kasigurohan nga ipadayon ni sa modaog nga mayor.

Dili nato mahimong diktaran ang modaog nga mayor unsay iyang buhaton sa Sinulog.

Busa ang labing maayong buhaton ni Rama mao ang pagpaabot sa resulta sa eleksiyon sunod buwan aron masigurong di mausik ang kahago ug gasto sa preparasyon.

Dili pa karon ang hustong higayon nga mamugos si Rama sa iyang gustong mahitabo sa Sinulog sanglit wa pay siguro modaog ba siya sa eleksiyon. Temprano pa kaayo alang niini.

Way lalis nga ang SRP haum gyud  nga dapit alang sa Sinulog aron maminusan ang kahuot dinhi sa downtown ug uptown area.

Ang problema lang mao nga dako-dako ang preparasyon nga kinahanglan kun itandi sa naandan nga venue sa Cebu City Sports Center.

Unang gisugyot ang pagpahigayon sa Sinulog didto sa SRP sa miaging tuig apan wala ni mahinayon tungod sa pagsaka sa mga kaso sa COVID-19.