Malinawong pangampanya

Gidayeg nako ang mga kandidatong lokal dinhi sa Sugbo kay wa na ko makadungog nga migamit sila’g pagpanghasi aron nga mapaboran ang ilang kandidatura.

Bisan dinhi sa Cebu City, wa gani ko makadungog nga adunay pagbayloay og masakit nga pulong sila si reelectionist Mayor Michael Rama, Margot Osmeña ug Dave Tumulak.

Sa Mandaue City, si reelectionist Mayor Jonas Cortes ug ang iyang kaatbang, malinawon ra nga nangampanya, ingon man si Talisay City Mayor Samsam Gullas ug ang iyang challenger nga si Vice Mayor Allan Bucao.

Sa probinsya sa Sugbo, mihimo ra usab og malinawong pagpangampanya sila si reelectionist Gov. Gwen Garcia ug ang iyang challenger nga si kanhi Tourism Secretary Ace Durano.

Apan sa Bohol, wa man tuod magbayloay og init nga pulong sila si reelectionist Gov. Art Yap ug ang challenger nga si Aris Aumentado, ang nakabantay ko nga dunay mga hugaw nga klase sa pangampanya.

Dunay mga dumadapig si Aumentado nga kusog kaayo manghimo og mga “fake news” aron sa tumong nga madaot ang pagkatawo ni Gov. Yap.

Para nako, way problema kon ang usa ka kandidato motug-an ngadto sa publiko sa tinuod nga kasayuran, apan kon maghimo-himo na gani og “fake news” maglagot na hinoon ang katawhan sa naghimo niini.

Awhag nako sa mga kandidato nga padayon mo sa malinawong paagi sa pagpangampanya ug ibutyag sa katawhan ang inyong tinuoray’ng rason ngano nga milansar mo.

* * *

Dunay mga opisyal nga pagtabang gyud ang ilang katuyoan sa paglansar, kay gani, mogasto man sila sa ilang madawat nga sweldo sa pagtabang sa mga tawo nga nanginahanglan gyud nga tabangan.

Sama ni Konsehal Junjun Osmeña, atol sa COVID-19 pandemic, dako kaayo ni og gasto pagpanghatag og bugas ngadto sa mga pobre. Suheto gyud kaayo mi nga mga media sa City Hall.

Kon may mangayo’g tabang ni Junjun, basta masabot lang niya nga angay gyud nga tabangan, di kini magpanuko sa pagkuot sa iyang bulsa.

Gani, mura’g nadasig ko ni Junjun ug mao nga gisunod sab nako ni ug sa ginagmay’ng paagi, bisan dili ko opisyal, mitabang sab ko sa grabe gyud nga nanginahanglan apan wa ra nako kini gipahibawo.

Daghang politiko nga grabe ka matinabangon sa ilang katagi-lumolupyo ug mao nga sila pinangga sa katawhan. Sama diha sa Talisay City, di gyud magpanuko si Mayor Samsam Gullas sa pagtabang, ug labaw na si Mayor Jonas Cortes.

Napamatud-an gyud nako nga kon manggihatagon ka sa nanginahanglan, ang Ginoo ra ang magbawos nimo. Matag sangpit nako sa Ginoo, iya gyud ko nga gipaminaw ug gihatag ang akong gipangindahay.