Tubig

Mahinungdanon baya gyud kaayo ang tubig sa tinuod lang. Niadtong unang panahon ang mga sibilisasyon naumol man sa dapit duol sa tubig. Ang Tigris ug Euphrates nahimong saksi man niini didto sa Mesopotamia.

Kun unsa siya kamahinungdanon ang tubig usab mamahimong makuyaw labina kun siya na usab ang maglagot.

Sa panahon ni Noe sa Karaang Tugon, ang tubig maoy nigun-ob sa mga nasud ug nihunos sa kinabuhi sa katawhan. Ang tubig makabuhi apan sa laing bahin makapatay.

Sa pagsulod ni Agaton ug karon ni Basyang nahimong nabutang sa kakuyaw ang kadaghanan kanato.

Didto pa lang daan sa Baybay, Leyte daghan naman intawon ang namatay gumikan niini. Ang mga pagdahili sa mga bungtod ug pagkagusbat sa mga tulay timailhan lamang nga gamhanan gyud ang tubig.

Ang iyang bul-og mamahimong sinugdanan sa kalaglagan sa kadaghanan.

Sa akong nakita sa mga videos Facebook bisan pa man kun dunay mga batan-on nga mipakagamay sa maong hitabo ug gani nihimo og mga pasiaw niini ang kamatuoran nagtudlo kanato nga malisud ning mga panahona.

Ang kinaiyahan naningil na gyud sanglit sa atong mga laraw sa kalamboan nahimo siyang hawa ug gani atong gitamakan ang iyang katungod. Nahikalimot kita sa buhing matuod nga kita mismo mga tipik lamang sa usa ka dakong uniberso.

Nisugod na ang laing hugna sa atong kasaysayan. Alang sa mga New Agers napupos na ang panahon ni Pisces, panahon na karon ni Aquarius kun ang tubig.

Sama sa tubig matud pang Sun Tzu kita mo survive labina kun puy-an nato ang usa ka paling paling nga kinabuhi. Apan kun atong buhaton kini unsaon na lamang moralidad?

Ug sa akong tan-aw daghan na karon ang nahimong subjective ra kaayo sa ilang panlantaw sa kinabuhi. Ang mahinungdanon alang kanila mao nga sila mamahimong mabuhi bisan pa man sa dakong bakak nga matang sa pagkinabuhi. Ug kini magpadayon ang bukid sa atong mga gitinguha mamahimong motabon kanato.