Semana Santa

Undang usa kita kadiyot sa politika ug panahon usa sa paghinuklog sa atong relasyon ngadto sa labaw nga makagagahom taliwala sa pandemiya, bagyo ug uban pang trahedya nga midagmal kanato sa nangaging mga bulan.

Semana Santa na usab ug panahon na usab nga isentro nato ang atong mga gimbuhaton ngadto sa kahitas-an. Kon buot nato nga hunahunaon, hamubo lamang kini nga panahon nga atong gigahin ngadto sa Ginoo sulod sa usa ka tuig.

Kinahanglan unta nga atong himoon ang matag semana tibuok tuig isip Holy Week aron paghalad sa atong kinabuhi ngadto sa kahitas-an. Kay kon wala pa ang Labaw nga Makagagahom nga mogabay kanato, wala gayud kitay mahimo.

Apan ang nakapait tungod kay padayon ang atong pagkahisalaag gikan sa Ginoo. Mas gipili pa nato ang paglunang sa sala tungod sa atong personal ug kalibotanon nga panginahanglan. Ug nalimot kita sa dakong obligasyon ngadto sa kahitas-an.

* * *

Tungod kay nag-obserbar na man usab kita sa Semana Santa, daghang kalihokan ang ipahigayon sa lokal nga kagamhanan ug simbahan. Ug sigurado nga dakong bul-og sa katawhan ang mosaksi niining mga pasundayag.

Apan ania pa kita taliwala sa pandemiya sa coronavirus disease. Ug angay lamang nga atong batonan ang pag-amping pinaagi sa pagsunod sa mga health protocol aron malikayan ang tinakdanay sa makamatay nga COVID-19.

Mapasalamaton kita nga miubos na matag adlaw ang mga bag-ong kaso sa COVID-19 dinhi sa dakbayan sa Sugbo ug tibuok lalawigan. Maglaum lamang kita nga magpadayon na kini aron sa ingon mabuntog na nato ang COVID-19.

Simple lamang ang kriterya aron mahuman na kining maong pandemiya. Kini mao ang pagsunod sa mga palisiya sa kagamhanan batok sa coronavirus disease. Bisan pa man kon nagkaubos na ang mga kaso, dili gayud kita mokumpiyansa.