Ang sakripisyo ni Kristo

Gipahigayon kagahapong adlawa ang bendita sa lukay isip pagsugod na sa Semana Santa diin gitambongan sa mga magtutuo kinsa nagbitbit og mga lukay sa lubi aron mabendisyonan human sa misa. Sa gawas sa mga simbahan midagsa usab ang mga tawong nanginabuhi sa pagpamaligya sa mga lukay depende na sa klase ug gidak-on ang presyo halos ang uban inangkat ra usab ug aduna usay sila gyud mismo ang naghimo.

Apan unsa man gud ang buot ipasabol sa Palm Sunday o Bendita sa Lukay? Gibutang pa gyud kini sa kasing kasing sa mga tawo, nakasabot ba gyud kita sa buot ipasabot niini?

Matud sa resident priest sa St. Therese of the Child Jesus nga si Father Japhet Geonzon, ang Palm Sunday sa passion sa Ginoo mao ang kadaugan ni Kristo sa pagsulod sa Herusalem.

Gisugat siya sa mga magtuo bitbit ang lukay isip paghangop sa iyang pag-abot. Apan sa ngadto-ngadto nasaksihan kon unsa ang tinuod nga kinaiya sa mga tawo nga milimod ug mitalikod kaniya ug ang pagbudhi nga naghatod sa Iyang kamatayon sa krus.

Kining tanan nakaplano nang daan tungod sa dili masukod nga gugma sa Ginoo ngadto sa katawhan pinaagi sa pag-ula sa dugo sa Iyang bugtong anak nga si Hesus.

Nahunahuna ba kini sa mga tawo nga Iyang gitubos karon? Siguro ang uban nakahunahuna niini pan adunay uban nga nakahuna huna man apan gibalewala kay ang gipatigbabaw mao man ang personal nga gustong himoon niining panahon sa Semana Santa.

Holy Week alang sa uban vacation week o adlaw alang sa relaxation, laag, family bonding sa beach ug bisan asa nga dapit adtoan alang sa personal nga kalingawan.

Nawala na ang tinuod nga meaning sa atong paghamdum sa sakripisyo nga gihimo sa atong Ginoo kanato tungod kay giuna nato ang atong personal ug lawasnon nga katagbawan dili ang spiritual satisfaction nga mao ang sentro sa atong obligasyon isip sumsunod sa tunob sa atong Manunubos. Dili man nato mapadaplin ang kamatuoran nga nagkinahanglan kita og bakasyon aron makaginhawa sa kakapoy o stress. Busa gikinahanglan nato nga magbakasyon apan unta dili nato kalimtan nga unahon ang pagpaginhawa sa atong kalag nga dugay nang nalumos sa atong mga sala nga nahimo.

Kausa ra ni sa usa ka tuig ang atong spiritual renewal ug mahimo nato kini pinaagi sa paghinulsol ug sa pagpamalandong sa mga sayop nga atong nahimo dungan sa pagpangayo og pasaylo.

Nagpakamatay si Kristo tungod sa walay sukod Niyang gugma nato busa dili nato ilubong sa kalimong ang Iyang nahimo alang sa atong kaluwasan.