Rentangay, carnap sa atubangan

Nadakpan sa mga operatiba sa Highway Patrol Group-7 ang usa ka babaye nga sakop sa grupo nga "Rentangay," kining mga gitawag nga carnap sa atubangan sa tag-iya sa mga sakyanan.

Modus niining grupoha nga maniid sa mga tawo nga ilang mabiktima pinaagi sa pagsuod niini ug kong makuha na ang maayong kabubot-on ayha na dayon moingon nga abangan ang sakyanan niini.

Makatuo sad gyud ang tag-iya kay ang mga carnapper mao man ang mo-facilitate sa mga dokumento nga fake diay, samtang mohatag pud gyud sila og advance payment nga tulo ka buwan.

Sagad sa ilang mabiktima ang kadtong mga nanag-iya og sakyanan nga wala pa kaimpas sa car loan sa bangko kinsa mangyawat nga maka-income aron duna say ikadata sa ilang utang.

Apan inig abot na sa panahon sa nga lukaton na sa tag-iya dili nila makita ang sakyanan kay giprenda na sa sindikato ug mao pay mangayo og kwarta sa tag-iya sa sakyanan nga ilukat.

Laing pamaagi nila nga pugson ang tag-iya nga ipalukat ug kong dili dayon malukat ilang ibaligya na ang sakyanan ngadto sa Mindanao gamit ang mga fake nga papeles.

Kadtong babaye nga nadakpan sa HPG hilabihan pa arogante nga mao pay nasuko ngadto sa mga tag-iya nga daghan og pasulot, perting maayohan mamaba o maayong motabi.

Abi man nako og sa kaulohan lang kini nahitabo apan naa naman diay kini dinhi sa Sugbo diin matod sa HPG nga aduna na sila daghang nadawat nga reklamo nga sama niini nga pagpangilad.

Dili na mahadlok ang mga suspek kay kong ingon sa tag-iya nga kuhaon na ang sakyanan bisan og lukaton pa, moingon lang kuno kini nga dili na niya iuli ang dakyanan bisan mosumbong pa sa mga otoridad.

Grabe ka garapal kining maong matang sa mga kriminal, sa atubangan gyud ni dunggabon ang mga biktima.

Nadakpan man sa mga otoridad ang naasoy’ng babaye apan makapyansa ra man kini ug balik sa naandan nga pagpangilad.

Kong ingon niini naman lang mahitabo nga makagawas ra kining maong mga tawhana dili gyud masulbad kining problemaha. Busa gikinahanglan nga magmatngon gyud ang mga tag-iya og sakyanan nga dili mosalig bisan kaila pa nimo kay dili kita kaseguro nga mao na kini ang maghatod kanimo sa kalbaryo.