Pilia gyud ang mayo

Kada buntag, way hunong ang mga kandidato sa lainlaing pwesto sa kagamhanan pagsuroy sa kabalayan sa mga botante aron pagdani kanila nga sila botohan karong Mayo 9.

Nakabantay gud ko nga ang ubang kandidato, pwerte na nga niwanga tungod sa grabeng kakapoy nga ilang giantos aron lang nga makadaug.

Sayonan ka nga sa gabii, dugay’ng makatulog kay mopahigayon pa sila og mga pulong’pulong aron pasabton ang mga botante ngano nga angay silang pilion.

Unya, inig ka buntag, sayo kaayong momata ug mobangon kay manuroy na sab. Kinsang lawas nga dili moniwang niana? Inighuman nila’g suroy, naa pay lainlaing kalihokan nga ilang tambongan.

Nakurat lagi ko sa pipila ka kandidato nga akong nakit-an kay miniwang gyud.

* * *

Tungod sa kadaghang mga botante nga pilian, kadaghanan sa mga botante dili makatimaan kon kinsa ang angay’ng pilian aron ilang botohan.

Mao na diha nga ang uban, modangop na lang sa pagbotar nga sundon nila ang mga ngalan nga anaa sa ipanghatag nga sample ballot sa mga kandidato.

Sa ato pa, ang tibuok grupo sa mga kandidato maoy ilang botohan. Pero ingnon ko kamo nga dili kana maayo, kay duna may mga maayong kandidato ang matag pundok.

Kini maoy rason nga dili ko mobotar nga ang tanan sa usa ka grupo maoy akong pilion. Pananglit, sa grupo sa BOPK dunay mga maayong kandidato, apan duna sa’y maayo sa BARUG.

Kami nga dugay kaayong nadestino sa Cebu City Hall, suheto kaayo kinsa ang mga maayong pilion, apan dili ko makasulti niini dinhi sa akong lindog.

Kon gusto mo nga magiyahan, pamatia ko sa akong programa sa DYLA (8:00-9:00) sa gabii kay pasabton nako kamo kinsa ang angay’ng suportahan.

Usbon nako, kaming dugay na kaayong reporter sa City Hall nga nag-cover sa City Council, nakakita gyud kon kinsa ang maayo’g binuhatan.

Suheto sab mi kon kinsa ang mga konsehal nga maayo lang mopaira’g-irag sa ilang mga tuwang-tuwang nga lingkoranan ug tagsa ra kaayo mosalmot sa pagtuki sa isyu. Di ba tinuod?

* * *

Akong pahibaw-on ang katawhan, ilabi na ang mga nagpuyo sa kabukiran sa north district, nga malangan ang pagkahuman sa Lusaran Bulk-Water Project nga mag-supply og tubig sa kabalayan sa Busay, ug ubang kanait nga dapit.

Nakapahibawo ra ba ko sa una nga hayana mahuman ang proyekto sa buwan sa Mayo. Ang rason sa pagkalangan, mao ang pag-igo sa bag-yong Odette nga napahunong ang trabaho kay nangaputol ang alambre sa kuryente.

Matud sa kontraktor nga tingali aron na sa buwan sa Hulyo o kaha sa Agosto. Pasensya kaayo.