Temporaryong kadaugan
Gipahibawo ni Presidente Rodrigo Duterte atol sa iyang pagduaw dinhi sa Sugbo niadtong Huwebes nga iyang gimando ang pagpahunong sa tanang reclamation project sa tibuok nasud.
Lakip niini ang mga giproponer nga proyekto dinhi sa Sugbo. Usa sa kontrobersiyal nga reclamation projects sa Sugbo mao ang Consolacion tungod sa pagsupak sa mga tag-iya og shipyard ug mga lumolopyo nga maapektohan niini.
Matud sa presidente nga dunay report sa pangurakot diha sa pagpahigayon og mga reclamation project hinungdan nga nakahukom siya sa pagpahunong niini.
Gitugyan ni Duterte sa mosunod nga presidente ang paghukom ipadayon ba o dili ang mga nag-ong-ong nga mga reclamation projects.
Apan asa kutob mahimong barugan ni Duterte ang iyang kamandoan labi pa nga dunay mga tawong suod niya ang nalambigit sa maong matang sa negosyo?
Pananglitan dinhi sa Sugbo, dunay mga giproponer nga reclamation projects nga ang mga nagpasiugda iyang mga kaalyado o ba kaha gipaluyohan sa mga tawong suod niya.
Makabalibad kaha si Duterte kon kini manghangyo niya nga padayonon ang ilang proyekto?
Dili kaha kaunon ni Duterte ang iyang gipanulti kun manghangyo na ang iyang mga higala, sama sa iyang pagtulon sa iyang kaugalingong pamasangil batok ni Mayor Michael Rama?
Kun nahinumdom mo, si Rama apil sa listahan sa iyang mga gipasanginlang nalambigit sa narcopolitics.
Sulod sa pipila ka higayon gyud nga gihisgotan niya si Rama ug hangtud ron wala kini niya bakwi-a.
Apan samtang wala niya bawi-a ang iyang pamasangil, kaduha na sab ka higayon nga iyang giindorso si Rama isip iyang kandidato.
Labaw kay sa pag-isa sa iyang mga kamot, makiangayon alang ni Rama ug sa iyang pamilya nga bawi-on sa presidente ang iyang pamasangil ug angkunon nga nasayop siya sa iyang pagpakauwaw sa mayor kun wala gyud siyay ebidensiya.
Kun nahimo ni Duterte nga ipadaplin ang seryoso niyang pamasangil tungod kay kaalyado niya si Rama sa politika, di sab imposible nga kalimtan sa presidente iyang kamandoan pagpahunong sa mga reclamation projects.
Busa sayo pa alang sa mga supak sa mga reclamation projects ang pagsaulog sa temporaryo nilang kadaugan.
- Latest