Anino sa pamolitika

Dili maayo ang nahitabo sa Arat na Cebu concert didto sa Cebu City Sports Complex niadtong Sabado sa gabii, Marso 26, 2022 nga gitambongan ni Cebu City Mayor Mike Rama ug mga kaubanang politiko.

Kay imbes lunlon hudyaka ang tumong sa maong kalingawan, misangpot man hinuon sa pagdinut-anay, diin adunay nakuyapan, nangabun-og ug nangagaras.

Ang daghang nahabiling paresan sa tsinelas human sa hitabo, makatug-an nga ang gitugotang 33,000 ra unta ka free concert ticket holders ang makasulod, wala mapugngi. Kay matod pa, miabot pa kunog 100,000.

Matud pa, daghang pekeng tiket ang nakalusot. Diin kon aduna pay gitugyanang tig-ihap sa pila na ka tiket gikan sa mananan-away ang nakolekta, pag-abot sa ihap nga 33,000 controlled number, mahibaw-an unta nga sobra na kini sa gikasabotang gidaghanon ingkasog aduna pay motunol og laing tiket. Ug dinhi, matiktikan na nga may mga fake tickets nga nakalusot.

Pila man diay ka entrance ang giablihan? Dapat usa ra. Buwahan, matarong pag-ihap ang pila na ka buok nakasulod?  Ug kon sobra sa usa, kinahanglang may nindot paagi aron masayran gihapon kon wala ba pa mosobra sa 33,000?

Basta, pag-abot sa 33,000 serad-an na ang entrance gate.

Apan basin baya, bisag walay tiket gipasulod? Libre baya ang maong konsiyerto? Busa, fake man o orihinal ang tiket, hala, dawat kay dawat ra! Natural, moawas gyod ang venue. Kaanugon, sa 33,000 controlled number nga wala iimplementar!

Hinuon, giklaro sa organizers nga nalimtan nilag butang og security features ang concert tickets. Hinungdang na-peke! Ug usab mipasabot sa publiko nga ang presensiya ni Mayor Mike ug mga kaubanang politiko didto sa venue walay bulok pamolitika kay ang organizers mismo maoy miimbitar nila isip guests.

Ang pangutana: “Kinsa man kaha ang maong organizers? Nganong ang mga kaatbang wala man paapila?

Ug bahin sa giingong walay bulok pamolitika ang maong concert, lisod tuohan.

Kay ang kahayag nga miiwag sa presensiya ni Mayor Mike ug mga kaubanan, dili gayod makatabon sa nahulmang anino nga miamag sa ilang likod – ang dili matagong anino sa indirektang pagpamolitika.

Panahon na sa tanang kandidato nga mangampanya. Nganong itagotago pa man kini? Ibuhos na, all my dear candidates! Basta, bawal ang siniraay, ha?