Mga buaya sa socmed

Usa ka negosayante ang akong naestorya mahitungod sa pagkabiktima niya sa usa ka online hacker ug gigamit ang iyang social media account sa pagpangolekta og kwarta sa iyang mga kaila.

Si Mr. Earnswel Abad gustong mabutyag ang ingon niini nga modus aron makahatag og warning sa mga tawo nga dili gyud mokompyansa sa mga ka transaksyon sa social media.

Sumala niya nga usa ka dakong negosyante ang miadala og mensahe kaniya og miingon nga iapil siya sa ilang grupo apan gikinahanglan nga i-click ang link aron maproseso ang membership.

Apan uwahi na nga nasayran niya nga ang gidahum niyang kaila nga negosyante dili na diay mao sanglit ang hacker na ang nakig transaksyon kaniya kay unang na-hack na usab ang businessman.

Human ma-click niya ang link, didto na na take over sa hacker ang Facebook ni Abad ug dili na niya maabli apil ang iyang messenger.

Gikawat na sa hacker ang iyang identity kinsa nanghuwam og kwarta sa mga kaila sa biktima diin gipasangil sa hacker nga anaa siya sa emergency busa sa walay paglangan mipadala usab dayon og dagkong kantidad.

Misalig kuno dayon ang mga kaila nga mihatag sa kwarta kay negosyante pud ang biktima ug makabayad dayon apil pa ang interest, miabot na sa kapin P200 mil ang nakolekta sa hacker sa mga contacts sa biktima.

Nasayod ang negosyante nga segi naman lang og bagting ang telepono nga nagpahibawo kanila nga napadala na nila ang kantidad nga gipangayo hinungdan nga na-shock intawon siya kay wala man niya kini himoa.

Midangop siya sa mga otoridad aron matabangan sa nahitabo kaniya kay gawas nga gigamit ang iyang account nalooy usab siya sa mga kaila nga mabiktima sa hacker.

Dili na bag-o pa ang ingon niini nga modus kay halos matag karon ug unya naa gyuy mabiktima sa mga scammers sa social media tungod kay ang mga cyber criminal nag estambay kini sa atong social media nga nangita og pamaagi kanus-a makasulod.

Mura silag namingwit sa mga tawo nga motukob sa ilang paon aron makahakop sa bisan unsay ilang maposlan.

Sumala sa opisyal sa Regional Anti Cyber Crime Unit RACU7 nga naghitak ang ingon niini nga modus diin mo-average sa 30 ngadto sa 50 k reklamo ang ilang madawat kada buwan.

Mipasalig man sila nga maaksyonan dayon apan dunay mga challenges nga ilang giatubang nga mao ang kooperasyon sa mga stakeholders sama sa remittance centers ug uban pa nga padad-anan sa salapi. Niining panahona gikinahanglan nga magmatngon kitang tanan sa pag-handle sa atong social media, makaayo man kini apan dunay dakong kadaut nga mamugna kon magdanghag kita.

Amping, “think before you click” aron dili mabiktima sa mga buaya nga nag atang sa atong social media.